吳若希繼續爆老公疑似一腳踏兩船：追緊我時送99支花畀另一個女仔

吳若希 (Jinny) 最近再戰樂壇，為了宣派最新派台歌《為何你要背叛我》，近日就頻頻接受電台訪問大講兩性關係，仲擺埋老公Alex上枱。之前Iinny就話老公唔勤力造人，跟住又話老公拍拖時背叛過她，昨日她又再繼續大爆老公當年疑似一腳踏兩船的「惡行」，老公曾經令她有如新歌歌詞中那種被背叛而撕心裂肺的感覺。

Jinny重提呢件兩年前的舊事：「嗰時有記者話我老公追緊我時，竟然喺情人節送花畀我之餘，又送花俾其他女仔，我只得18支，但嗰個女仔有99支，之後我有問返老公點解，但男人都係避而不談。」Jinny坦言自己以前會嬲，但現在只覺得好好笑：「老公叫我放心，佢話以後送花畀我一定多過99支，所以佢依家每年都送101支。」其實當年Alex於那次送花事件曝光後，有在他的facebook發聲明向Jinny公開道歉兼剖白心迹，Jinny亦選擇原諒了老公，現在一家三口好幸福。