【古宅首映】張繼聰首度與朱茵合作　演對方兒子：佢對眼識講嘢！

張繼聰昨晚（27/9）出席銅鑼灣舉行的電影《古宅》首映禮。首次與朱茵合作拍攝驚慄片，阿聰在戲中飾演朱茵兒子，當接到這個消息大為驚訝。「一聽到嘅時候，心諗唔係呀，可以同女神合作？以前做觀眾睇佢啲戲，已經好鍾意佢，睇佢以前啲戲係好有靈氣，好容易俾佢吸引住，而家同佢演對手戲，佢對眼真係識講嘢，佢真係一個好好嘅對手，佢好容易令對手入戲，演戲好細膩，我哋係片埸等埋位嘅時候，大家都會傾吓拍戲嘅趣事，佢又會分享佢嗰個年代與現在拍攝嘅分別，同時大家都係校友，都會傾吓讀書時嘅往事，實在太開心。」

早前楊怡被傳媒潛入屋苑，偷拍家中情況被撞破，同屬於一個屋苑的張繼聰表示憤慨：「冇眼睇，我哋之後梗係有同屋苑反映啦，其實傳媒朋友同我哋藝人應該係一個好緊密嘅關係，係應該互相尊重，我覺得有陣時有啲底線過咗，冇咗一啲嘅專重喺度，咁唔係幾好，雖然我哋都係做幕前但都會同屋企人住，每一個人都有私隱，所以希望以後都唔好有任何嘅傳媒，再做以上嘅行徑，潛入私人地方偷拍，咁樣係唔應該，相信係個別事件，希望大家互相尊重。」