【已讀不回】岑樂怡首次擔正緊張到瞓唔著　拍喊戲靠睇「狗狗片」

ViuTV新劇《已讀不回》昨日（21日）舉行記者會，首次擔正做女主角的岑樂怡（阿妹）出席活動時表示心情難免感到緊張：「我成個禮拜瞓唔著覺啊，一路都畀好大壓力自己，因為第一次擔正做女主角，又驚播咗之後大家嘅反應，又驚自己表現得唔好。」

除了第一次做女主角，阿妹稱自己也是第一次吊威也，卻不幸發生了小意外。由於工作人員未有留意到拍攝場地有簷蓬的關係，所以當她由8樓跳下去時手肘撞在簷蓬上，幸好她當時穿著長袖上衣才沒有留下太大的疤痕，只是瘀了一大片。（以後會不會考慮安排替身？）「唔會選擇替身，因為呢樣嘢幫到自己，拍完呢場戲之後對角色更加了解，對之後拍嘅劇情有更大嘅幫助。」

劇中與兩位男主角有多場感情戲，她提到其中一場離別的戲份令她崩潰痛哭而特別印象深刻：「我第一次拍喊戲，好驚自己喊唔出，點知一去到嘅時候，嗰陣已經拍到第十日，自己已經好投入狀態，所以一喊就收唔到，仲走埋一邊自己喊咗半個鐘。」她指幸好當時好拍檔黃又南在旁指導她從戲中走出來，並跟她分享自己初入行拍戲太投入的經歷。被問到如何揣摩拍喊戲的心得，阿妹指自己很喜歡小狗，所以會回想曾看過的感人小狗影片來催眠自己。