鄭秀文盛讚鍾楚紅攝影有天分　自嘲冇sense：我影啲相好呆板　

鄭秀文（Sammi）今日（20日）以一件露背白色T-shirt襯黑色皮革裙亮相銅鑼灣，為「米奇誕生90週年」展覽揭幕。活動上，米奇公仔和Sammi大玩錫錫，氹得她非常開心，Sammi也說今日見到米奇老鼠「真身」特別興奮，勾起不少童年回憶。

上星期日（16日）「山竹」襲港，不少屋苑、寫字樓、公共設施等都受到嚴重摧毀，Sammi表示當日自己屋企還好，同時也在密切留意市民的安全：「屋企露台落咗個鐵閘，咁就遮咗好多風，但係嗰日都會成日留意住個新聞啦，睇下個天氣嘅變化，同埋最重要就係睇下有冇市民受傷，最驚就係呢一樣嘢。」

日前Sammi和鍾楚紅（Cherie）、甘比一齊欣賞紅姑的攝影作品，她盛讚對方有天分，講到自己對攝影有無興趣時，她便即刻否認：「咁又冇喎！我對攝影係完全冇sense嘅，我影啲相係好呆滯、好呆板。」不過，Sammi就坦言自己好鍾意看展覽，如果出埠或者旅行時，可以配合到時間，自己都會抽空看展覽，類型就離不開fashion：「鍾意睇時裝嘅展覽啦，或者傢私嘅展覽，特別鍾意睇傢私嘅。」

Sammi今日凌晨就起身準備工作，之後便開始拍廣告，還要趕場出席活動，都咪話唔辛苦。今個星期日就是中秋節，不過Sammi說自己連同整個團隊都要工作，所以沒有辦法和家人一齊吃飯。