自爆修讀演藝期間曾約會　潘燦良：見到蘇玉華就好似見到陽光！

有「劇團王子」之稱的潘燦良昨日（15/9）為梁泰來主持的電台節目《1圈圈星光背後》擔任節目嘉賓時，大談與女友蘇玉華的相識經過，直言「見蘇玉華如見陽光」，亦自覺二人性格雖不相似，但很合得來，而談及二人的婚期，潘燦良坦言因為懶惰而遲遲未結婚。

潘燦良與蘇玉華早於香港演藝學院讀書時已經約會過，後來又雙雙加入香港話劇團。被問及蘇玉華給潘燦良的第一印象時，他說：「佢畀我嘅第一印象就係見到佢就好似見到陽光咁，佢經常笑，畀人一種好活潑好開心嘅感覺。最初有約過佢，但最後都唔成事，可能當時各自都有自己嘅選擇。其實喺香港話劇團嘅時候，我哋唔係一起，只是同事而已。直至她離開話劇團，因《我和春天有個約會》成名以後，我哋後嚟再合作《人間有情》就再遇上，才慢慢開始（發展）。」

談到兩人拍拖22年，至今仍然非常甜蜜。能夠維繫感情這麼久，潘燦良表示除了背景相似，性格上能互補不足也是原因之一：「我哋會開始係因為大家嘅背景都很好接近，一齊相處之後，亦發現互相性格都係合得嚟。性格合得嚟意思並唔係個性相似，我同佢係完全唔同。我比較柔弱，又比較保守穩重一啲，但佢就係比較勇敢、開放啲。我哋一凹一凸，其實某程度上係配合得嚟。我欣賞佢好有膽色，有時我都會畀人悲觀嘅感覺，但佢就係好樂觀嘅人，所以佢喺呢方面能夠影響到我。」

另外，其實潘燦良已經多次求婚，蘇玉華也答應了，但至今仍未正式結婚，他坦承是因為懶惰：「結婚嘅儀式係絕對可以做，不過或者我哋雙方都比較懶，我哋不時會想結婚，但隔一陣就會放低咗。加上我哋覺得依家狀況好好，大家都認定對方係餘下人生嘅另一半，對我嚟講佢已經係我嘅家人。」