【颱風山竹】徐小鳳演唱會主辦單位被鬧爆　終跪低公佈改期退票

超強颱風山竹襲港，多區出現嚴重水浸塌樹，災情嚴重。天文台早於一星期前發出預警，提醒大家呢次威脅相當嚴重，講明星期日中午後山竹最接近香港，盡早將周末活動改期。徐小鳳原定今晚（16日）舉行演唱會尾場，剛剛1點宣佈改至17號晚舉行，但網友群情洶湧留言鬧爆，到底發生咩事？

小鳳姐一連6晚演唱會，由9月7號起於紅館舉行，16號即係今晚就會係尾場。超強颱風山竹強城襲港，9成9活動都提早宣佈取消或改期，但小鳳姐演唱會主辦單位，至昨晚11點仲出post話「尾場之演出安排，將於9月16日下午四時三十分公布詳情」，引起大批已購票或購票予家中長輩嘅網友留言鬧爆安排失當。「9:40am已經10號啦﹗草菅人命﹗」、「公公婆婆為咗唔好浪費錢，冒住危險去睇演唱會，出事邊個負責﹗」

16號朝早7點40分懸掛9號風球，2小時後10號風球再現，天文台亦講明10號波會維持好幾個鐘。演唱會主辦方終於提早於喺中午一點發出聲明，宣佈演唱會改期，希望已購票人士得到通知唔好再冒險外出。聲明全文請看下圖：