楊明護花撐女友莊思明反被鬧：原來有些網民係咁惡㗎？!

馮盈盈 (Crystal) 日前於有份主持的無綫節目《後生仔傾吓偈》中，因為與另一主持麥明詩 (Louisa) 講到港姐嫁有錢人時，她表示：「如果我哋嫁畀有錢人，就畀人話睇死佢啦！想吊金龜啦！係雞，係公廁！」她這番「係雞係公廁論」一出，隨即惹來極大的迴響，就連歷屆的港姐師姐都有批評Crystal。

當中莊思明 (Lisa) 就話：「成個感覺好cheap，對自己形象唔好，亦有損港姐嘅形象。」而Louisa就於IG開post撐Crystal，又暗寸Lisa妄下斷言，令罵戰一觸即發，不過並非她們三女的罵戰，而是粉絲同網民的罵戰。

一班支持Crystal的網民就大鬧Lisa，又指她多事，甚至於King Jer的IG相關post下面繼續留言係咁鬧。Lisa的男友楊明 (Mat) 心痛女友被人鬧，就於King Jer的IG post度留言護花，話Lisa當時只係回應記者的問題，唔明點解發表自己的感受都要被人鬧，仲話：「喺節目中亂講嘢嗰個就反而無問題，我真係唔明網民係咩心態！」強調自己絕對支持女友Lisa，又叫大家就算唔認同也不要人身攻擊同抹黑她。不過Mat的留言一出，結果係唔少網民連他都鬧埋。

Lisa亦有於她的IG story先後寫了兩段文字抒發自己的感受，第一段是結所有Haters的﹕「……你們會想盡辦法用最毒的字眼去傷害那個不認同你的人！這種思維很恐怖，但我不會畏懼！」而另一段就是講自己做人從來都是對事不對人的，但好明顯有些人並非如此，她不想再講了，因為根本無道理可言。

而Mat都有於他的IG再度維護女友，發長文表示：「今日睇到有網民不斷人身攻擊思明，我有點驚訝，驚訝嘅係原來有些網民係咁惡㗎？! 思明從頭到尾都係對事冇對人，記者問佢聽到呢啲用語喺節目出現有什麼感覺同見解，佢祇係答咗自己對這些用詞嘅感覺啫，都唔得？

唔係咁惡吓嘛！唔通同你哋嘅思維唔同嘅人就係你哋嘅敵人？咁成世人咪好唔得閒？

各位大俠，如果真係覺得自己支持嘅想法係有道理嘅，點解唔用你哋嘅鍵盤將你個理由同真理講出嚟，睇吓可唔可以改變到人呢？真係覺得攻擊係一個好方法？

我哋雖然係唔紅嘅藝人，但亦都係一個人，好多嘢我哋都識講，係睇下我哋講唔講又或者啱啱場合講嘅啫，你哋都可以通街痾屎㗎，夠哂貼地啦…你哋唔痾…？唔識尊重別人你都會盡量尊重吓自己吖…係咪？世界好大㗎
，多啲出去曬吓個太陽接觸多啲唔同嘅人，曬螢光幕唔係生存嘅唯一方法! 大家一齊加油啦。」