【颱風山竹】卓韻芝無懼風雨嫁愛郎　不怕山竹搞亂檔：又名夫妻果

卓韻芝（阿芝）今日舉行西式婚禮，邀請圈內外好友一齊開Party，有最強姊妹團陪嫁，阿芝接受訪問時更直言超級颱風「山竹」令她的婚姻更順利，而鄭秀文（Sammi）、梁詠琪（Gigi）、蔡卓妍（阿Sa）亦有會見傳媒，三人著上統一粉紅色系但不同款裙，各具優點， Sammi型格，Gigi優雅，阿Sa活潑清麗。
現場採訪：吳子生、協力：陳栢宇

才女卓韻芝和從事電影美術的「閃電俠」梁子賢今日（15/9）在中環外國記者會舉行婚禮。新娘阿芝在晚上九點左右接受傳媒訪問，她直言整個過程都令她非常緊張：「我冇諗過自己都會眼濕濕！（先生都好緊張？）佢一定緊張啦，佢唔係幕前，對住公眾咁多人講嘢喎！佢尋晚已經好緊張，係咁講『聽日娶老婆、聽日娶老婆、聽日娶老婆』。」又謂事前不知道老公發展感言時會講甚麼：「我係第一次聽，知道對佢嚟講家庭真係好重要，佢話佢以佢爸爸做榜樣，我都聽得眼濕濕。」

問婆婆見到孫女終於出嫁是否倍感高興，阿芝即笑指婆婆最開心是可以飲酒：「其實幾日前佢見到我着褂佢已經好開心，而家佢最愛嘅嘢都喺晒度，所有親戚都喺加拿大、挪威兩度返晒嚟，我婆婆可以一次過見晒所有女、孫同埋曾孫。（婆婆有冇同你講啲咩？）佢話兩公婆最緊要係互相忍讓、互相禮貌對待。我都有問佢婚姻係咩，而佢都有一段好美滿既婚姻，直至有一日公公離開咗仙遊，不過婆婆就唔知呀，見步行步！即係每段婚姻都有唔同處境，要保持住學習心態。」又笑指婆婆經常催他們生B亦坦言要等工作辦妥後才可以去阿根廷度蜜月。

提到超級颱風「山竹」襲港，問他們會否擔心影響婚禮？阿芝就指從來沒有特別擔心過：「天嘅嘢擔心唔嚟，我都有問我先生有冇擔心，佢話唔擔心，佢有念力！其實我都有搵過山竹到底係咩植物，我先知原來佢又名『夫妻果』，所以都算畀咗個機會我哋順利開到個Party。」

之前阿芝形容自己是「佛系新娘」，對婚禮細節不太執著，做過多次姊妹的阿Sa 也笑稱這次做姊妹是史上最輕鬆的一次：「我哋應該係最舒服嘅姊妹團，因為新娘都無特別要求我哋做啲咩，是最輕鬆的一次。」最到無得玩新郎會不會覺得可惜，Gigi說：「不可惜，如果真係畀我哋玩，佢哋就會覺得好可惜，最好不要，我覺得今晚都幾簡單，但係隆重，我哋係直接嚟飲，就無玩新郎。同埋新娘都好隨意。」Sa指新郎相比之下就顯得比較緊張，兄弟團也一樣緊張，她更大讚新郎「真人靚仔過上鏡」，比起阿芝的熱情奔放，新郎則比較害羞，Sammi笑指她們是負責來搞笑的。

問到婚禮中有沒有哪個時刻令姊妹們覺得感動，Sammi 笑說：「佢嫁得出我已經好感動！」阿Sa 被記者問，今晚是否負責接花球，Sammi 馬上說：「肯定啦，我哋接來都無咩意義㗎喇。」阿Sa也說身邊的好姊妹都嫁得七七八八，今日還特地問助手：「我啲朋友結晒婚未㗎？佢話『應該仲爭容祖兒』。」Sammi 笑說：「咁你要快過佢！」阿Sa則指隨遇而安。