【鐵探】與張寶兒首次合作拍劇　袁偉豪爆料：佢喊到收唔到聲

袁偉豪（Ben）現身將軍澳無綫劇集《鐵探》煞科宴。早前阿Ben透露為咗個角色要減磅要戒糖戒鹽，經過幾個月拍攝工作，終於煞科可以盡情吃喝玩樂：「我嘅戲份喺9月1日已經拍哂，因為個身體咁長時間冇食過鹽，第一日返到屋企，第一時間攞包薯片嚟食，呢十日裡面一日三餐都食到，早一兩日前突然左腳小腿以下成隻腳腫哂，於是乎上網摷資料，睇下發生咩事，自己都好擔心會唔會係腎功能同埋心臟出現咗問題，最後去咗睇醫生，驗血做哂檢查一切正常，醫生話可能我呢四個月食的太清淡，突然之間變番正常飲食習慣，身體接收唔切啲鹽份所以腳腫。」

張寶兒第一次拍劇集，能夠參與一個咁大製作嘅劇集，作為男友有冇過兩招比佢呢？「好開心可以同佢分享拍攝嘅心得，回想起二十年前自己入行都唔知自己拍緊乜，今日有機會我會時常提住佢，喺拍戲嘅過程都有啲好有趣嘅地方，試過有場戲講佢要喊，佢喊到收唔到聲，一路都冇停過，我同梁烈唯在場想入對白都入唔到，真喺幾好笑，監製仲話我哋俾佢放到一頸血，相信成件事對寶兒來講，呢個經驗都好寶貴。」