劉浩龍拍跳樓戲冇用威吔　自覺死過翻生：諗返都好驚！

劉浩龍今日（8日）獲邀出席港台「職安健常識問答比賽2018」活動，他接受《香港01》訪問時坦言好開心能夠參與活動：「因為令我回想到做新人嘅時候嘅回憶，呢個活動每一年都會參加，覺得好有意義，其實有好幾年都冇參加，今次再參與，真係有另一種感覺。」

問之前拍動作戲時有否做足安全準備？劉浩龍透露拍攝電影《李小龍》（2010）時，在沒有有安全措施情況下拍攝跳樓戲，當時飾演一個右腳殘障人士的他說：「呢一世我都唔會忘記，可能當時自己年青，導演話乜就乜，都冇諗過咩叫安全，好記得我係要徒手爬上樓6樓屋頂追逐，仲要跳過兩層高對面樓度，拍咗成十幾次，係完全冇『威吔』嘅情況下一Take過拍攝，之後返到酒店我係喪喊，因為諗返覺得好驚，點解會咁做，萬一有意外發生咗，屋企人點算，會諗好多呢啲問題，而家安全為上，都係對屋企人一種責任。」