【晚吹】媳婦控訴同住奶奶：同老公親熱都話唔三唔四

「婆媳鬥爭」似乎是一個永恆的話題，早前TVB 劇集《BB來了》掀起一陣討論婆媳關係的熱潮，ViuTV 節目《又要威又要戴頭盔》最新一集，亦請來一眾與奶奶同住的新抱，對奶奶作出大控訴，分享幾個令人髮指的個案！

新抱沖涼老爺要去廁所︰「你無嘢畀人睇㗎啦」
當中有幾個新抱同時控訴奶奶去廁所永遠不關門，其中一個最離譜的，是奶奶不僅自己不關門，也不准其他人關門，更把門鎖拆掉，原因是方便別人用廁所時，她也可以進來使用。這位新抱說：「我試過沖沖下涼，奶奶拍門話：『家嫂，老爺急尿要入嚟去廁所，你冇嘢俾人睇㗎啦，佢又唔係未睇過。』」引起一眾嘩然，主持二汶直呼：「癡線，性騷擾嚟㗎喎！」

同老公親熱奶奶衝門「照田雞」
之後幾個新抱都異同聲說與奶奶住毫無私隱可言，與丈夫進行性生活時，要開啟「靜音模式」已經算小兒科，有幾個奶奶更特別喜歡趁阿仔新抱親熱時入房。被奶奶禁如廁關門的新抱便說：「奶奶好鍾意趁我同老公親熱時，用我房門鎖匙開我房門，入嚟攞嘢，最抵死嘅係，奶奶仲會鬧：『你咁唔三唔四，同我個仔喺度做咩呀？』」呢個奶奶真令人側目，新抱也說：「唔通你同老爺親熱，我又話你唔三唔四？」而另一個新抱也說她的奶奶會無啦啦在半夜走入嚟，用電筒「照田雞」。

有新抱控訴奶奶婚前婚後兩個樣，婚前自己在奶奶眼中是阿仔的女朋友，但結婚後，就是全家人的工人。這位新抱表示，結婚前已經與老公家人一齊住了四、五年，奶奶都十分和藹可親，家務都不太需要自己幫忙，但婚後就要求她包辦所有家務。二汶說，可能之前覺得你過門都係客，但一入門，「初歸新抱，落地孩兒」，服侍夫家就變得理所當然，甚至會覺得你搶咗個仔走。

婚前晾底褲得，婚後又唔得？
而另一個遇上相同情況的新抱，亦是婚前跟夫家一起住了四年，她說：「我婚前有好多壞習慣，東西亂放，奶奶都冇話我，但一結婚，入門那一刻就變了。例如我之前習慣把內褲晾在房內，結婚後，佢開始鬧我，關心底褲晾喺邊，佢話︰『晾喺房，濕氣會好重，會搞到我個仔風濕。』淨係佢個仔會風濕，我就唔會風濕囉。」也許奶奶的說話沒錯，但新抱也會介意她只在意自己個仔的健康。主持二汶說，也許因為奶奶認為婚前個仔未揀定，所以也不好意思對對方指三道四，一旦入門，成為「自己人」，就不用客氣了。

講到奶奶有咩口頭禪，其中一個新抱說，奶奶經常提「我當你係親生女」，她說：「其實呢句難聽過粗口，佢同屋企個工人姐姐都係咁講。」還有最經典的「我份人最開明」，呢句可說是「伏中之伏」，相信都好多人曾經深受其害。

仲有下集！
主持余迪偉叫新抱們以一句說話形容奶奶，形容詞包括：「係未飲孟婆湯的清朝人」、「最佳女主角」、「佢比較無知，但又會扮晒無所不知」、「好似武則天一樣獨霸天下」，唔知各位新抱有無共鳴呢？不過又不是個個奶奶都咁衰，可能在她們眼中，新抱也是洪水猛獸呢，不知道ViuTV 會不會整返個「奶奶篇」？下星期睇埋「新抱篇」下集先，可能仲多嘢爆！