陳煒驚訝好姊妹張文慈「唔撈」：拍劇時間長會易鬧情緒
撰文：吳子生
出版：更新：
陳煒穿上低胸晚裝長裙華麗登場，出席好友香港名設計師何國鉦（Dorian)於香港會議展覽會舉行的大型時裝活動。煒哥最近為某美容院做埋代言人，身型比之前重要Fit。「因為做咗代言人，有瘦身廣告喺身，美容公司有贊助，做咗佢啲儀器，真係比之前瘦咗好多，起碼有成10磅咁多。」
陳煒被問到好姊妹張文慈昨日向傳媒表示，對演藝失去咗方向，冇成就感，好想休息一下，煒哥聞言非常錯愕：「我琴日見到佢喺IG留言想放棄，我以為佢做嘢辛苦，仲叫佢休息下，佢有咁同記者講咩？」煒哥睇完相關報道後表示：「其實每個人都會有情緒，尤其是拍戲拍到好攰嘅時候，每日拍成20個鐘，有陣時係會氣餒，可能係嗰一刻啫，我會繼續支持佢，佢係好正面好陽光嘅一個女仔，佢唔會咁易放棄，我稍後會打電話俾佢同佢傾。」