【全民造星】觀眾鬧爆賽制有缺憾　出局大熱Anson Lo有機會復活？

ViuTV選秀真人騷《全民造星》為觀眾帶來不少話題，而賽事亦進入白熱化階段，愈來愈少參賽者能夠脫穎而出，在昨日（5日）播出的第38集中，更有10位B組的學員被淘汰，剩下20位「仔仔」繼續參賽，當中B組的姜濤、Ian、Lokman、肥仔和狗毛有得留低，而大熱門阿Dee、Anson Lo等則被Foul出局，至於本身是A組的Jer、管鋈、里奧仔、Jason和Moley則因為賽制關係而轉到B組繼續賽事。

其實在20強結果正式宣布之前發生過一段小插曲，卓韻芝、郭偉亮和側田等一班B組導師覺得至少有7名學員值得留低，所以希望與劉美君、火火等A組導師商討能否調整淘汰人數。雖然大會便擔心再一次更改賽制會令觀眾感覺《全民造星》兒戲，但因為B組不乏可造之材所以考慮讓步。

當劉美君感覺到大會有此傾向時，即火力全開炮轟大會，指如果情形發生在A組，大會必定果斷否決：「而家你哋直情兒戲啦，個個都偏幫B組，我唔想講嘅，我到而家先出聲，係因為你哋由頭到尾都冇睇好A組。我好心痛，所以我好畀心機教佢哋，火火都都畀心機教，就係知佢哋冇天分，死教爛教，贏到出嚟，亦都係公平贏架喎，係咪先？我而家面都紅晒，真係火滾。你哋個個都係幫B組，因為佢哋個個都有天資。」最後大會、導師取得共識，鐵定B組Foul走10位學員。

當然，不止B組的導師為着痛失10位學員而感到可惜，一班坐在電視機面前的B組支持者亦覺得非常痛心，當中不少Anson Lo擁躉更在ViuTV的facebook洗版，斥不少A組學員比起Anson Lo更應該出局，更有人希望ViuTV可以將Anson Lo復活，與其他參賽者再爭長短，否則罷睇《全民造星》。好多觀眾亦將Anson Lo被踢出局歸咎於賽制有問題，30強比拼以三盤兩勝來決定生死，不但兒戲亦必定令應該留低的學員被淘汰。不過，亦有網民指以上睇法絕對是輸打贏要。

對於網民鬧爆20強人選名單，身兼撰稿的「旁白君」文卓森接受《香港01》訪問時直言《全民造星》是一個「選秀真人騷」，不能排除汰弱留強的環節：「節目就係而家娛樂圈嘅縮影，各間娛樂公司嘅代表用返而家娛樂圈嘅規則、眼光去評價一班參賽者，現實就好似呢個比賽一樣咁殘忍，只係這種殘忍放咗喺枱面畀大家見到。」他明白觀眾在收睇節目的過程中會投入、會有自己的心水之選，但話事的始終是五位星級評判：「即使我哋ViuTV全力幫99位參賽者，提供咗個平台等佢哋全力以赴，但呢個娛樂圈好多嘢從來都係娛樂公司老闆話事，話點就點。」

提到不少人批評《全民造星》賽制有問題，又批評ViuTV在節目開始至今亦未有清楚交代他們想選出怎樣的學員，引致評判在評選時毫無指引，旁白君坦言ViuTV事前沒有訂明選秀準則：「我哋從來冇話特定要揀咩類型嘅學員，唔係話唱歌叻、跳舞勁、個樣夠好睇或者識得Rap，係交返比娛樂公司、主流去決定。」又有不少網友指《全民造星》雖然名為「全民」，但「全民」元素欠奉，觀眾無法選出自己的心水，旁白君便指之後一定會有投票，但方法、實行日期有待日後公布。

點擊下圖逐格睇旁白君代粉絲擁抱大熱門姜濤：

提到今晚（6日）舉行的《全民造星粉絲見面會》中有已經被淘汰的Anson Lo亮相，問其是否有機會復活，旁白君明白不少觀眾戥Anson Lo唔抵：「但個賽制就係咁，要尊重個賽制。」至於《全民造星粉絲見面會》則以學員、導師的表演為主，已被淘汰的參賽者亦有份演出，而司儀則由阿神和阿Dee擔任。

Anson Lo有份在《全民造星粉絲見面會》中表演，點擊下圖逐格睇他上台前的情形：