【特技人．專訪】胡諾言晒肌獲激讚 憶曾為角色增肥：好有挫敗感
TVB新劇《特技人》出街後，雖然精彩的特技場面欠奉令唔少劇迷失望，但劇中演員的演技的確令劇集加分不少。其中在劇中飾演關楚耀童年好友兼傅嘉莉經理人的胡諾言，「裸跑」一幕更是令人印象深刻。
現年41歲的胡仔，近年熱愛運動，更是明星跑步團「Crazy Runner」的成員之一。胡仔雖然年紀稍長，但身形明顯比關楚耀更Fit，胸肌加上六舊腹肌相當搶鏡。但胡仔就強調自己的身形並非「大隻」：「我的身形唔叫大隻啦，算係比較鋼條型，係我玩馬拉松而獲得的成果。其實我同阿關嗰場戲，我覺得佢都好Fit，因為佢喺飲食方面都控制得好好，雖然佢出來的效果比較瘦，但我覺得足夠。始終佢的角色係導演，導演唔需要追求身形。所以，我同佢嗰場戲，出嚟效果大家都好滿意，無必要比較。」
見到胡仔身形咁Fit，大家何曾想起胡仔在2006年曾與在劇集《肥田囍事》中為了扮演肥仔角色，令本來130多磅的他在短時間內急增40磅。憶起當年增肥，胡仔稱比起鍛練六舊腹肌更加困難，他稱：「增肥的過程中，當你增唔到嘅時候真係好有挫敗感，好有壓力，結果要透過朋友介紹飲營養奶，先可以喺兩個月內由130磅增至170磅，其實仲未夠，因為170磅未算得上係一個肥佬，起碼要200磅先達標，但我嘅身形根本肥唔到，所以係一個好大考驗。當中都好有挫敗感，但最後都完成咗。而今次接到呢個工作，好彩自己有跑步，但跑步有另一個問題就是會消耗肌肉，難度係呢度，所以跑步同時都要健身，互相平衡。」
首次飾演經理人的胡仔亦為這個角色花了不少功夫。胡仔在劇中相當「醒目」，多次為旗下藝人化解危機，胡仔稱現實中的自己屬於比較獨立的藝人，所以並未向自己的經理人取經，反而以圈中兩位「金牌經理人」黃柏高與霍汶希為藍本：「我初初入行就被經理人帶得多，但呢幾年甚至乎10年，已經訓練到自己照顧自己。我哋TVB經理人亦都無咁多時間可以好周全咁照顧我哋，而我都覺得唔需要，自己做到咪自己做囉，所以都無用返自己經理人嘅寫照。我反而有留意娛樂圈的經理人，譬如我第一時間就會諗起Paco同Mani，佢哋一眼關七，處事亦好圓滑，做任何嘢EQ都好高，所以我會用呢幾個Point去演繹。」
【特技人．專訪】沈卓盈洗脫「大台花瓶」：出幾多努力有幾多成績
【特技人‧專訪】羅浩銘八年時間由特技人變指導 思考動作最重要
至於近年唔少藝人自組公司兼任埋經理人，但胡仔就自覺自己並不適合。他表示：「無。未有咁嘅能力，我好享受做演員同主持，好享受以演員的身份去做一份工作。（你覺得做藝人同經理人邊個角色比較辛苦？）其實我覺得兩者都有輕鬆同難的地方。輕鬆的地方，演員的話最緊張係幕前做好自己，唔好做一啲難堪的事要經理人揹鍋。主要係喺工作上，以藝人的身份盡全力去做，做完之後得到歡呼聲你咪會好輕鬆。而經理人輕鬆嘅位就係佢睇到自己旗下嘅藝人由無人識到有人職，含辛茹苦湊大佢，有好多難堪的說話都自己頂晒，自己藝人有一日能夠發光及亮，就會覺得自己眼光無錯，放下心頭大石。」雖然如此，但胡仔身為人父始終覺得照顧兒女比起任何工作都來得辛苦。
Hair : Sue@k11haircorner
Makeup : phoebeyung
Shoe : joy&mario
Venue: 星影匯