羅蘭玩食雞好精靈　扮龍婆把聲嚇隊友：夜喇…返歸啦…

現年83歲的羅蘭演龍婆就夠晒驚嚇同經典，而她私底下卻是一個非常之可愛的老人家，而且仲好精靈好聰明，就算同後生仔一齊玩都可以完全無代溝㗎。日前羅蘭姐就同無綫節目《後生仔傾吓偈》的大學生KOL周程宇 (Vitas)， 一齊於Big big channel入面的《後生仔興趣班》第二堂打機玩食雞。無錯，你無睇錯，係羅蘭姐玩食雞，仲玩得好開心添。

Vitas同羅蘭姐以及另外兩個隊友組成一組玩食雞，其中一個隊友見到自己個隊員叫「羅蘭姐」，竟然驚喜到爆粗並問：「你係咪真係羅蘭姐？」羅蘭姐就答話：「係呀。」之後Vitas又叫羅蘭姐用恐怖Tone嚇下隊友，羅蘭姐即刻龍婆上身變晒聲講：「夜喇…返歸啦…」，真係好玩得，好搞笑呀。羅蘭姐全程都玩得好開心，好投入，仲好客氣咁同Vitas講：「好在有你帶住我呀嘛。」好sweet呀！

食完雞之後，Vitas就同羅蘭姐玩完Switch，比賽鬥食得多熱狗。羅蘭姐好乖咁跟足Vitas的指示去玩，擘大口做出食嘢的動作時，更配埋音不停咁「umm、umm、umm......」食得好快，非常之可愛，結果仲贏埋添，又話：「好飽呀。」唔少網友都話好想同羅蘭姐一齊玩呀。下集預告就係羅蘭姐玩VR，好潮喎！

一齊睇下羅蘭姐食雞同食熱狗時有幾可愛啦。