Super Girls搞Party與粉絲聚會　Aka玩遊戲竟被紅薯粉嚇親

Super Girls相隔兩年再推出快歌《閨蜜專用》，日前五位成員Aka（趙慧珊）、Heidi（李靜儀）、Yanny（陳穎欣）、Jessica（蔡明思）及Cheronna（吳嘉熙）於觀塘舉行粉絲聚會，與60多位粉絲舉行「閨蜜派對」。派對中，五位成員為感謝粉絲6年來的支持，即場為他們炮製愛心雞翼，期間又與粉絲玩跳舞估歌、恐怖箱遊戲等，最後還與粉絲一起唱新歌《閨蜜專用》，作為「閨蜜派對」的最後禮物。

其中玩恐怖箱遊戲伸手入箱估物件時，自言細膽的Heidi率先玩，雖然箱內只放了假髮，不過現場粉絲「誤導」下，Heidi直言被嚇親︰「我未摸到已經好驚，fans不停話呢樣嘢好恐怖，又嚇我係動物會郁，搞到我唔係好敢去摸。」至於同樣挑戰「初階版」的Jessica成績排最尾，她無奈表示︰「我真係估唔到係咩，本身見到Heidi第一個玩只係摸假髮，所以冇咁驚，起碼覺得我去玩都應該係摸死物，不過原來之後佢哋又要摸蟹同墨魚，我覺得自己好好彩，只係摸個好多毛嘅水果紅毛丹。」

向來大膽的Cheronna只用了4秒便估到箱中的墨魚，其後她拿着墨魚去嚇Jessica，嚇到對方尖叫逃走，至於Yanny亦非常大膽，摸蟹都難不到她，反而最後挑戰的Aka亦被浸在箱中的「紅薯粉」嚇一嚇，以為自己要摸魚，經現場粉絲「提水」後才鬆一口氣，事後她強調自己不是細膽︰「其實我哋唔係驚摸生物會被咬，而係驚摸到眼呢啲部位好嘔心。」

提到今次炮製雞翼給粉絲，五位成員對自己的廚藝相當有信心︰「其實我哋都鍾意煮嘢食，一定唔會難食嘅，所以大家放心，2013年試過同粉絲燒嘢食，當時有燒畀佢哋食。」Yanny則提議組合10周年，眾成員再展廚藝為粉絲炮製Super Girls私房菜，她表示︰「我哋10周年時應該搞個大抽獎，限5個名額，然後煮一餐私房菜畀粉絲食。」