【專訪】薛家燕以好姨一角逆轉人生：只係有愧於仔女

60年來打着同一份工，薛家燕不但沒有感到半點厭倦，且愈做愈起勁，最近為了十二月的首個紅館演唱會，更化身成Captain Nancy。
鏡頭前，薛家燕總是給觀眾帶來歡笑，但回想當年經歷婚變後，辛辛苦苦捱大三個小朋友的日子，薛家燕依然是感慨良多。「有幾次拎模範母親獎，我覺得都要仔女生性先得，尤其是單親家庭，復出拍《真情》時，佢哋知我好辛苦，不時都會寫紙仔：『媽媽，我們很乖，不要擔心。』大女珊珊嗰時得9歲。」

薛家燕8歲那年在爺爺的壽宴上表演，誤打誤撞做了童星，拍完一部又一部，爸爸雖然擔心影響學業，但媽媽卻認為有天份，所以不可錯過，結果唯有每日五點起床練功再返學，這樣的童年算是快樂嗎？「當時兩毫子一支維他奶，我拍戲有十元，當然開心，後來到片酬幾千幾萬，爸爸用啲錢嚟幫我買樓。」當年的樓價幾萬元有交易，換言之，薛家燕拍一部戲就已經買到一個單位。有名有利，直到28歲那年，在片場一覺醒來被蚊咬到飛起，令她萌生了一個念頭：「我當下問自己到底追求什麼，已經有名有利，係咪應該搵自己想要的東西？父母都想我搵到好歸宿，但又反對我同圈中人一齊，那時星馬剛流行錄影帶，我就這樣做了代理。」薛家燕並未有提到她在28歲那年邂逅了從事餐飲業的商人石保慶，並為對方誕下三名子女、搬到美國生活，後來男方有婚外情，將所有資產轉到媽媽名下，薛家燕與三名子女被趕走。

為仔女復出

婚姻破裂，要養大三名子女談何容易，就在這時她遇上了《真情》。「大女（珊珊）問我係咪好想拍，佢覺得角色唔多好叫我唔好拍。後來佢問我係咪真係好需要錢，話會睇住細佬妹，叫我放心去工作，我即時攬住佢喊。佢得9歲，但好多嘢都會執得好正，就算到𠵱家，細佬妹有事要商量，都係搵家姐先。」《真情》播出沒多久，好姨一角令薛家燕忙得無時停，為怕仔女在家唔聽話，她搬了一個薛家燕人型紙牌棟喺屋企，現在回想起來當然笑得出，但卻也有着一絲絲內疚。「有一日同細女出門口，見到佢對鞋花晒，我叫佢快啲買過對，佢話對鞋着咗三年才剛剛好，原來佢係因為唔想浪費錢，所以特地買大了幾號，我一上車即時喊出來，覺得好陰功，三年我都冇留意，個心真係好難過……」如今仔大女大，身體也曾發出過警號，是否該停下來享福？「坦白說，由婚姻失敗到復出，真係得到好多機會，人生有幾何？如果呢個圈用得着我，又或者因我關係而令其他人有工開，咁就唔應該揀job。好多謝《真情》令我在經濟上有安穩的家，同埋忙到冇時間去諗傷心嘢……只係有愧於仔女。」

薛家燕說她並不是特別聰明，多年來靠朋友的照顧，令她度過了不少難關，這次處女紅館唱，嘉賓名單相信可一不可再。她說不少天王巨星一收到她call，二話不說度期再向她教路，令她感到人間有愛。不過，奇怪的是，入行60年，登台無數，為什麼現在才擁有紅館演唱會呢？「十幾年前耀榮叔都有提過，但當時我拍劇日日都要開工，所以就唔係咁想，直到去年又有人搵我，我都半推，後來愈申請唔到愈想開……」薛家燕年初娶新抱，年底紅館騷，好事成雙，現在最期待的大概是抱孫吧？她哈哈大笑起來，說抱孫可能會是她退休的最大原因。不過目前她最想要的是瘦身︰「李居明大師有問我服飾如何，說胸襟可以開大一點，愈闊愈好運，哈哈，我唔需要隆胸，但要練聲練氣。」

場地提供:六公館