Jasper新作《爸爸去哪兒6》播出無期　廣電總局：禁炒作明星小孩

近年內地親子真人騷有如雨後春筍，《不可思議的媽媽》、《媽媽是超人》、《想想辦法吧！爸爸》，都以藝人帶同仔女亮相作招徠。去年《爸爸去哪兒》，令陳小春應采兒囝囝Jasper小暖男形象深入民心，連帶小春兩公婆都成為真人騷常客。不過呢日中國廣電總局發布「未成年人節目管理規定」，寫明「未成年人節目不得宣揚童星效應或者包裝、炒作明星子女。」小春同Jasper早前再參與《爸爸去哪兒6》拍攝，分分鐘無得播﹗

國家廣播電視總局喺8月24號於網上發布《未成年人節目管理規定(徵求意見稿)》，為期一個月對外徵求意見，但根據以往情況，此類規定應該都係勢在必行。全文共6個章節包含39條規定，包括「不得宣傳、介紹各類電子遊戲、不得製作未成年人參與的選秀類節目」、「應當嚴格控制設置競賽排名，不得設置過高物質獎勵，不得誘導未成年人現場拉票或者詢問未成年人失敗退出的感受。」即係連節目中玩完遊戲都唔俾問感受。

當中最大影響嘅應該係第十三條規定：「【避免成人化和過度娛樂化】邀請未成年人參與節目製作，其服飾、表演應當符合未成年人年齡特徵和時代特點，不得誘導未成年人談論名利、情愛等話題。未成年人節目不得宣揚童星效應或者包裝、炒作明星子女。」原定8月16號播出《爸爸去哪兒6》突宣布延期播出，時間點上相當巧合，令人不禁懷疑兩者有否關連。呢次對外徵求意見至9月23號，睇嚟要等多一個月先知有無機會再喺螢幕見到Jasper啦。