拍日版《SUITS》與織田續「前緣」？　鈴木保奈美：我會主動進攻

日本女星鈴木保奈美在神級日劇《東京愛的故事》（1991）中與織田裕二火花不斷，搞到好多日劇迷去到今時今日仍然翻煲劇集，回味故事結局為大家帶來的遺憾美。雖然「赤名莉香」和「永尾完治」最終未能一起，但鈴木保奈美和織田裕二好快便會再度攜手合作，齊齊為日本版《金裝律師》（SUITS）粉墨登場，不過兩人相隔27年再度重聚，並非重現《東》劇的戀人關係，而是飾演上司下屬。鈴木保奈美在戲中飾演律師樓老闆，而織田裕二則飾演她律師樓的精英律師。

首次挑戰律師角色的鈴木保奈美受訪日本傳媒訪問時直言期待：「我喺《金裝律師》裏面有主動進攻嘅一面，好期待拍攝嘅時候。」提到與織田裕二再度合作，她說：「拍《東京愛的故事》嘅時候，我啱啱先出道，真係只能夠諗自己嘅演出，冇注意到拍對手戲嘅織田裕二同其他演員。睇到織田裕二活躍咗咁多年，都好期待同佢事隔27年嘅合作，而且都對佢係用點樣嘅心情去拍呢套劇好有興趣。」又笑謂演律師好玩：「劇中都是高智商嘅人，感覺就好似用法律嚟玩遊戲咁，呢啲都係呢套劇嘅魅力所在，比起超級認真嘅嗰種律師，我希望能夠塑造一個游刃有餘嘅律師。」