林愷鈴由母親龔慈恩引薦　加入杜琪峯班底進軍影壇

林愷鈴(Ashley）今日（23/8）現身金鐘舉行著名化妝品牌活動。Ashley每次出席公開場合，衣著打扮漸趨成熟，散發出高雅氣質女人美。「其實有陣時好多人會問我：「你依家拍咁多化妝品廣告，會唔會好唔係自己呢？」我覺得係自己令一面囉，雖然本身我比較素妝，其實平時出街嘅我唔化妝好「喱啡」，所以有時間咁樣，我覺得非常有趣，我就唔覺得呢啲嘢喺我全部囉，其實身邊嘅朋友及家人，都知道我其實仲好白痴好弱智，唔係大家眼中咁成熟大個囉。」

Ashley加入杜琪峯公司旗下做演員，又唱歌又拍廣告身兼模特兒，自小在鎂光燈下長大，對演藝圈結下不解緣。「我喺工作方面對自己要求好高，我依加調節緊自己，唔好對自己太過苛刻，因為拍攝時，好多時天氣唔好，又或者有好多野配合唔到，我會嬲自己點解個一刻唔做好啲，但我要慢慢適應去放低，調節自己個心態。」

剛踏入18歲成人階段的Ashley，嚮往自由今年定下人生第一個backpack東歐旅程。「backpack喺我人生清單排第一位，本身今個暑假約咗成班同學backpack去旅行，但種種原因再加上當地局勢唔穩定，又唔係咁安全，所以再等我大個啲，等媽咪放心啲再去過。」