陳凱琳盼夫妻檔合作拍電影 鄭嘉穎:佢系我哋嘅當家

撰文:朱奕錦
出版:更新:
鄭嘉穎和陳凱琳(Grace)婚後首次出席活動,所謂「貴人出門招風雨」,戶外大雨滂沱,嘉穎一舉一動都護著太太,真系sweet到爆。結婚未夠半個月,但兩人已經開始投入工作,不過嘉穎表示並無影響:「我覺得兩方面都可以同時進行嘅,因為而家啲工作都唔系話拍戲啦,都系宣傳工作比較多,咁……系唔辛苦嘅,我哋要學習嘅一樣嘢就係multi-tasking,同時間要做好幾樣嘢,而家多咗個家庭要顧及。」

活動上,嘉穎和Grace表示兩人不介意夫妻檔揾真銀,只要有適合的工作就無問題,而Grace就希望兩人可以合作拍電戲:「因為對上一次就拍《僵》啦,就係啱啱認識嘅時候,咁我諗而家再拍,個默契會更加唔同囉。」不過嘉穎就話想拍一些輕鬆的題材,笑言「不如拍廣告算啦!」笑話歸笑話,一講到家中邊個掌握財政大權時,嘉穎摸著Grace的頭說:「佢系我哋嘅當家,都系佢管嘅啦。」身邊的Grace望著老公,會心一笑,相信已經甜上心頭。
早前有報導指兩人的新居正在裝修,不過嘉穎就說其實只是買了兩個單位用來投資,現在已經有人租用,所以只是謠言。至於之前有話兩人住酒店,嘉穎打趣地說:「Grace講攰呀嘛,所以揾人服侍下,如果唔系酒店,就係我嚟㗎啦。」既然現在已經結婚,不知道兩人的稱呼有沒有什麼變化呢?「都系baby。」嘉穎透露,不過Grace就搶答「我多咗嗌佢老公嘅。」嘉穎都好識做,即刻同大家講:「而家介紹,我太太!我都未講慣,佢都未聽慣。」兩人你一言我一語,真是隔著個mon都感受到他們有幾幸福!