劉德華演唱會林嘉欣劉心悠齊點唱　古天樂揀歌勁偏門

劉德華紅館個唱將於12月開鑼，早前信用卡預訂廿場演唱會一日之內已全部售罄。唔止粉絲歌迷要撲飛，就連眾多藝人都萬分期待，當中包括古天樂、林嘉欣、衛詩雅、吳卓羲、顏卓靈、劉心悠、陳家樂、周秀娜、胡子彤、吳肇軒以及廖子妤，群星為了在今次演唱會可以聽到心目中的好歌，都紛紛點歌，甚至大展歌喉，模仿華仔招牌動作唱腔瞓身演出。

華仔多年來唱過唔少經典金曲，一班「星級」粉絲都各有心水，好似林嘉欣最愛《如果我有事》：「可唔可以唱曬男女版呀？因為套戲真係好深刻又好好聽，聽親都好似催淚彈。」另一位女神劉心悠就希望聽到《忘情水》，仲曝露年齡秘密：「記得小學時一返到屋企，就將錄音帶放入機不停聽不停聽。」至於古天樂嘅心水就真係偏門啲啦，佢希望華仔唱《南音》：「《神雕俠侶》裡面華哥做咗神雕大俠之後，其實唱咗首《南音》，大家可能無咩印象但我就好深刻，因為我都做過《神雕俠侶》嘅楊過呀嗎，有親切感。」

不得不提嘅仲有陳家樂，佢等咗多年終於同偶像劉德華合作，拍攝電影《掃毒2》，仲漏夜買底褲，將華仔嘅《暗裏着迷》MV經典還原，由於華仔輪廓比較深，所以化妝時家樂會特別加深鼻骨同顴骨陰影，「放飯時間，妝都冇落，就咁除咗個假髮就去食飯，食食吓，隔離枱誤認咗我係劉德華，勁開心，哈哈。」除此之外，家樂話最難忘係MV尾段淋花灑部份，「我哋係拍咗呢part先，因為預咗唔會一take過ok，所以團隊都準備咗幾套衫俾我替換，但我自己唔記得預備底褲，所以拍完淋花灑後，同事就要漏夜跑去便利店幫我買底褲，然後先可以落街拍，真係辛苦晒。」