余德丞首度開腔錄音報平安：原來個心都停咗一段幾長嘅時間

余德丞 (Dickson) 本月初因踢波時突然昏迷而被送入瑪麗醫院深切治療部，情況更一度危殆，幸好之後脫離危險期，並轉到心臟科病房觀察，余媽媽亦透露仔仔Dickson已在逐漸康復中。而仍在醫院留醫的Dickson日前又於好友鄧佩儀 (Gloria) 的IG上留言。今日Dickson就透過Big Big Channel首度開腔錄音同大家報平安。

Dickson表示：「HELLO！我係Dickson，咁多位大家好，我覺得我今次真係好好彩，非常之感恩，非常之開心，今次可以大步檻過醒得番，再同你哋講嘢，衷心多謝全香港每一位嘅關心、問候、祝福同集氣，令我能夠醒得番！所以，真係好衷心咁多謝你哋。當我醒番之後先知道原來件事幾嚴重，因為我昏迷時候，原來個心都停咗一段幾長嘅時間，所以能夠企得番身，同大家傾偈真係好好彩，依家我慢慢康復，精神都好咗多好多，講嘢都清楚咗，當然，醫生都建議要留院多一段時間， check清楚身體係咪ok先可以出院。」他又多謝醫護人員以及家人朋友同事等，話希望可以快些出院同大家見面，有新消息會再通知大家。