符曉薇陀B患感冒拒就醫　陳柏宇：佢信網民都唔信自己醫生

陳柏宇（Jason)周一（20日）現身商台為新歌《認真如初》宣傳。早前Jason聲帶爆血管引致受傷，曾一度停工，過經一段時間休息，新歌終於面世，真喺有血有淚。「錄呢首歌真喺風風雨雨，諗住錄音前幾日，聲帶突然爆血管，之後休息完再錄，跟住又感冒，不過最終完成。」

Jason太太符曉薇（Leanne)陀B女8個月，預產期10月，近日太太感冒成個星期，堅持唔食藥睇醫生，怕影響胎兒，令Jason擔心不已。「佢又唔肯睇醫生食藥，上網聽啲人講話唔好食藥，我就覺得睇醫生喺最好，又唔見得佢咁辛苦就會對個BB會好，我又唔可以迫佢去睇醫生，只會不停咁游說佢去睇，一個同你開刀生仔嘅主診醫生都唔信，去信網上嘅人，佢今日最終book咗去睇醫生，佢去睇醫生咪好囉，醫生唔會害佢㗎嘛，佢養好個身體，Bb營養先會好，佢身體唔好，Bb健康咪又喺唔好。」

初為人父Jason，為迎接新生命，大部分嬰兒用品都準備好哂，英文名都改埋，不過Jason就話要保持神秘感喎。「暫時就唔想公開透露住，英文名會用A字頭嘅，不過呢個祕密遲早都會知，中文名方面自己都想過搵風水師去改一個有意義嘅名，雖則我唔喺一個迷信嘅人，但做咗又心安理得就何樂而不為。」