【大叔的愛‧專訪】監製貴島彩理不覺得拍BL劇前衛：好普通啫！

日劇《大叔的愛》今年春季在朝日電視台（TV Asahi）播出時，即因為其BL情節成為當地熱話，這個熱潮更一度席捲至香港，令不少觀眾拾回過往晚晚喪煲日劇的感覺，而這套作品播畢後亦橫掃日劇界各大獎項，分別在「第12回CONFiDENCE日劇大獎」和「第97回日劇學院賞」獲得「最佳作品獎」和「最優秀作品賞」。早前，ViuTV宣布播出《大叔的愛》這套話題作品，使其成為香港史上第一套在黃金時間播出的同志劇，而將於明晚（18日）9點半正式在香港首播。

構想源於生活細節　劇集探討什麼叫愛

《大叔的愛》監製貴島彩理早前接受Viu專訪，大談劇集角色、演員以及整個計畫，為香港觀眾熱一熱身。到底她是如何構想到這套劇集？貴島彩理笑說：「起因係一件小事，之前我喺一個同性朋友屋企留宿，佢每一晚都好溫柔咁歡迎我返嚟，煮宵夜畀我，朝早又早過我起身，為我沖咖啡同煮早餐……望住佢嗰個賢妻良母樣，我就突然喺度諗，點解我唔可以同佢結婚。」她坦言自己是想透過這個「大叔之間的戀愛故事」，去探討「喜歡一個人是怎樣一回事」這個主題。

田中圭具被愛才能　吉田是最佳女主角

其實《大叔的愛》大受歡迎，一班演員絕對是功不可沒，飾演「春田田」的田中圭更憑角色在「第97回日劇學院賞」奪得「主演男優賞」，成功稱帝。貴島彩理在訪問中盛讚田中圭演繹具說服力：「佢係一個擁有『被愛才能』嘅演員，劇裏面嘅春田田明明好冇用，但大家卻好鍾意呢個設定，證明佢嚟演呢個角色好有說服力。」而在兩大日劇獎中奪得「最佳男配角」的吉田鋼太郎亦備受讚賞，貴島彩理就覺得對方好性感：「明明好有男人味，但係又潛藏住可愛嘅地方。」又笑指對方是「最佳女主角」。

專玩偏鋒？　製作人：其實普通

提到《大叔的愛》題材新穎，與其前作、講述日本政府因生育過低逼使國民性交的《大人高校》一樣走偏鋒，問之後還想挑戰甚麼主題的劇集？貴島彩理即笑謂：「其實我冇挑戰過新穎主題喎！《大人高校》係講緊『點樣先可以成為大人』、《大叔的愛》嘅主題係『戀愛嘅美好』，呢啲都係好普通嘅主題！哈哈！」至於講到劇集在香港都好受歡迎，貴島彩理便指自己仍然覺得難以置信：「不過我真係好開心！」