【港姐2018】陳苑澄潮玩Kiki Challenge疑犯法　今日露面點拆彈？

社交網站嘅流行，不時有「網上朋友」TAG人接受挑戰，無論係冰桶挑戰還是最近瘋傳嘅In My Feelings Challenge。外國有唔少藝人都有拍片玩埋一份，但同時引起安全問題。前AS ONE成員兼今屆候選港姐陳苑澄亦玩埋一份，大晒長腿又揮動絲帶，係就係動作優美，但就引嚟大批網友留言炮轟：「拍片者危險駕駛，教壞細路。」

In My Feelings Challenge出自加拿大歌手Drake的新歌《In My Feelings》，由網絡紅人Shiggy帶起。事緣佢喺IG上載了一段以《In My Feelings》為背景音樂的原創舞步，事後被網友和明星瘋狂跟風，瞬間引起大眾關注。因歌詞中有一句「Kiki,do you love me? Are you riding?」，所以又稱「Kiki Challenge」。

候選港姐陳苑澄原本係跳唱組合AS ONE嘅成員之一，舞功當然有返咁上下，佢都跟上熱潮拍片分享，一開始陳苑澄對住鏡頭送上韓式心心手勢，然後開車門落車，露腰曬長腿，不時扭動身體SHOW出S線條，踢腿兼拎起彩帶棒揮動，最後掉低彩帶跳返上車。

本身佢都係想湊熱鬧兼曬下舞技，點知惹嚟一面倒負評，「拍片者危險駕駛，片主就亂丟垃圾」、「真係好無聊又危險，仲要巴士站黎，二來佢係片係無交代有執返都無拍到有執返，變相宣揚亂拋垃圾，危險行為又無叫人唔好亂試」片段明顯由駕駛位置拍攝，有危險駕駛之嫌，分分鐘已觸犯《道路交通條例》，最高可判罰款25,000港元及監禁3年。片段上載兩日超過一萬四千次瀏覽，仲要不停被鬧，陳苑澄都仲未刪片，又無回覆傳媒查詢。今日下晝佢會同其他候選佳麗出席活動，唔知諗好點拆彈未呢？