《森美旅行團》丁子朗大隻仔唔易做：養住嚿肌肉難過減肥好多

全新一輯的《森美旅行團》昨晚播出了第二集，今集終於齊人喇，四位主持包括森美、丁子朗 (Karl)、麥美欣以及吳若希，而Karl更是呢集的亮點所在。身為2016年香港先生亞軍，現年只有21歲的Karl，同森美一齊全裸上陣浸溫泉。作為嫩口小鮮肉的代表，Karl操得一副大隻仔身形，就連同樣爆晒肌的森美都大讚他。

Karl本身都有操肌，至於可有因為今次要全裸出鏡而再加緊操練？Karl接受《香港01》訪問時表示：「緊係要啦，森美大哥咁大隻，我拍埋去唔可以有太大對比㗎嘛，同埋唔可以失禮香港先生。我係3、4月收到通知要拍呢個節目時，就每日都去做gym，總之一有時間就做，去谷一谷啲肌肉唔好畀佢縮細。」

不過Karl是臨出發前幾日先知道要浸溫泉曬肌，他說：「但係我一早預咗啦，去得日本京都點會唔浸溫泉？(今次係你幕前演出最性感一次？) 絕對係。我都好滿意出嚟個效果，今次亦係我入行以嚟拍得最開心嘅一個節目。」如果大家仲想再睇Karl騷肌，他們之後有一集會在露天水霸度浸溫泉的，到時可以再encore。

對於Karl來說，由於他天生瘦底食極唔肥，所以不需要刻意keep fit，要練到8舊腹肌亦非難事，他說：「我原本係排骨仔，本身個肚好易見到腹肌線條，做sit up谷大啲肌肉就得，通常一次做百幾二百下。我天生瘦底食極唔肥，對我嚟講養肌肉難過減肥，有時飽到上心口都要夾硬食多啲肉同蛋白去養住啲肌肉，練大隻好辛苦。我有條橡筋可以去到邊都拉下嚟操肌，平日喺屋企可以拉，去旅行都會帶埋去。呢條橡筋好緊要，可以練到胸、背同手臂，而且方便攜帶。」大家在節目中見到Karl拉那條橡筋就是他的私伙。

仲有其他Karl嘅大隻仔靚相㗎。