《解決師》陳敏之感恩遇上好拍檔　兼顧工作家庭犧牲睡眠時間

陳敏之剛剛加入《解決師》成為劇中演員，今次監製搵到陳敏之加入之餘，亦新加入唐文龍，敏之表示今次二人係繼《溏沁風暴》之後再合作，「上次冇得同佢（唐文龍）開花結果，咁今次好好，監製俾我同佢拍拖，今次下場都會好好多。」

陳敏之劇中飾演一名女強人，角色係一名好人，但講到難忘事，敏之直言一定係同呢一班演員合作：「今次依然見到浩信，亦係第一次同詩詠合作，劇中每個演員好和諧好開心，我哋劇中更有好多新演員，咩類型都有。」

敏之除左忙劇集更忙於主持工作，工作以及家庭又點兼顧呢？敏之自稱自己做「超級媽媽」不眠不休，「我可以話俾你聽，我尋日開戲都開到凌晨四點，番到屋企都六點，但我11點幾已經起身帶佢去玩，咁我利用我休息時間陪佢，因為可以陪伴佢成長，如果好似我咁要兼顧兩件事，必須要自己辛苦少少，不過我宜家經常提醒自己身體健康，因為我病咗嘅時候會傳染俾兒子，唔可以同佢有親密接觸，所以我唔可以病。」不過敏之咁辛苦都冇考慮過要減輕工作量，敏之直言出道後工作上冇停過。