林欣彤聲音勞損死撐冇休息：擔憂年尾演唱會失準

林欣彤（Mag）今日（12日）出席夏日派對活動，而Mag於現場講說話比較細聲，聲音亦沙啞，發生乜事呢？Mag訪問中透露係喉嚨勞損：「其實我死撐咗一年了，之前同佢哋做舞台劇已經係死撐，嗰個時候好痛，唔理唔理，死撐落去。終於知道撐唔係一個選擇，所以俾心機休養，但我都有擔憂，年尾係演唱會，不過我覺得呢個係上天俾我嘅任務，要係唔完美嘅自已身上做到最好俾大家睇，希望係呢一件事上全部人都攞到力量，所以我會好好照顧自己。」至於要休養幾耐先可以好番？Mag直言需要一段日子，起碼要幾個月。希望Mag快好番用最好嘅歌聲獻俾大家。

聲音勞損，令到Mag講說話都要好細聲，唔敢太用力，問到會唔會因為咁而經常唔開心？Mag直言會唔開心，但都學習到好多，「我覺得人生就係咁，每件事情都有好多面，亦都會有令人難忘嘅地方，我覺得呢一件事情係一個提醒，令我知道好多事唔好太搏命，我要學習愛惜自己，可能係個天想我喺眾人面前克服困難，呢一件事就係最大禮物。」Mag同時好感恩身邊朋友嘅支持與關懷。

Mag與天堂鳥成員Tyrese傳緋聞已經一段日子，Mag聲音勞損Tyrese亦有關心，Mag仲好多謝佢。今日現場玩遊戲時候，眾人強迫Mag與Tyrese一組玩遊戲，會唔會尷尬？Mag覺得得冇問題：「我明白大家想要呢一個效果，冇所謂，大家開心就可以。」Mag強調二人只係朋友關係。