苟芸慧「幸福瘦」仍然不滿：女生永遠都唔會滿意

準人妻苟芸慧昨日（10日）出席香水品牌活動，每次苟姑娘出席活動，感覺上佢每見一次就瘦一次，苟姑娘對自己而家嘅身型滿意未？苟姑娘笑言女生永遠都唔會滿意自己身材：「不過最近真係健康咗好多，自己心態可能開心咗，好多人讚我唔同咗。」其實苟姑娘嘅變化係乜？係太幸福？苟姑娘直言：「笑得多咗，其他人覺得我好Sweet。」

婚禮即將來臨，緊張未？苟姑娘表示十分期待：「好多事情唔知道係點，好多事情係佢（陸漢洋）處理，所以好期待有一個好Sweet嘅婚禮。」咁苟姑娘渴望要一個世紀級婚禮？苟姑娘直言唔需要：「我哋希望細規模啲，可以同每一個嘉賓有交流。」

早前「處女黨」一眾好姊妹相約聚會，將照片發佈上社交網站，相中唯獨缺少喺加拿大安胎嘅鍾嘉欣，不少網民誤以為王君馨、岑麗香、李亞男及苟芸慧出國旅遊，苟姑娘回應：「其實我哋想去旅行，但大家好難夾時間，所以只搵到一個食飯位好似旅行咁。」苟姑娘講到女生圍繞討論話題，你懂的。