【兄弟大茶飯】蕭正楠感謝曹永廉神助攻 曾因一句說話不敢說笑
蕭正楠和曹永廉這對孖寶兄弟主持的節目《兄弟大茶飯》自出街後反應甚佳，不少觀眾邊睇邊笑，大讚兩位主持烹飪功力有返咁上下外之餘，亦盛讚互寸互窒的場面勁有火花。昨晚（9日）播出的一集中，蕭正楠和曹永廉便為正於深圳開工的《白色強人》劇組煮外賣，當他們在煲紅棗桃膠圓肉雪耳糖水時，蕭正楠便向觀眾介紹桃膠是桃樹分泌物，對女性特別有益，講完後他即講踩界對白：「其實我啲分泌物都可以俾女性食用！」曹永廉聽到後即加多把口拉對方女友黃翠如落水：「你淨係畀一個人食㗎啫！你無端端講啲咁嘅嘢，出唔出得街㗎？」非常搞笑。
其實，蕭正楠近年的搞笑功力確實是進步不少，無論在綜藝中還是劇集中，其喜感都能夠收放自如，總能令觀眾捧腹大笑，以《超時空男臣》（2017）為例，飾演「袁崇煥／雲大軍」的他就算普普通通行步路已經充滿住戇直喜感。問這種多變的喜感從何而來，蕭正楠接受《香港01》訪問時便答謂：「我真係幾鍾意搞笑，呢啲可能都係我老竇遺傳畀我，我唔敢講自己有喜感，我淨係鍾意同老廉亂噏廿四啫！」
即使父親早已2004年逝世，但蕭正楠仍然未有忘記到對方的搞笑事蹟：「佢面皮好厚，好鍾意成日拎身邊朋友嚟開玩笑，佢係家族裏面嘅笑彈嚟，依家個波就交咗畀我。（會好似你辣着咁阿廉咁辣着啲朋友？）十次裏面都有一、兩次辣着，佢知衰嘅時候都會好誠心咁道歉，但係過一排後佢又會搞返事，哈哈！不過，日子長咗所以朋友都會知我老竇係大細路一名，冇人會同佢計較。」他亦覺得現時既識得去搞笑又學到如何開心生活，父親應該好安慰：「無論佢喺邊，我都希望佢見到今日嘅我生活得好開心，唔使再為我擔心。」
【兄弟大茶飯】蕭正楠曹永廉打造下半年最佳綜藝 賤格對白逐格睇
不過，蕭正楠坦言有一段長時間不敢搞笑：「初初入行唱歌嗰陣，就係因為懶係搞笑，得罪咗人都唔知，我有好多年都唔敢亂講嘢，直至老廉喺我人生裏面出現，先至我嘅搞笑性格帶返出嚟。希望我同老廉，某日可以有星爺（周星馳）、達哥（吳孟達）嘅十份一火花。」
如果大家對娛樂新聞認識夠深，應該會記得蕭正楠2002年時初入樂壇即橫掃各大新人獎的威水史，當時唱片公司高層李進在一個慶功宴上恭喜他成績斐然，蕭正楠即回敬一句「邪不能勝正」，心想數個月前李進接受周刊訪問，文章標題正是〈邪不能勝正〉，既可以恭維對方又能夠搞搞氣氛，豈料有傳媒藉此大造文章，話他影射同期出道的麥浚龍，有傳聞指蕭正楠因此遭到封殺而被逼轉戰內地。不過，以上所述已成過去，蕭正楠亦放膽去搞笑。