【特技人】傅嘉莉面對負面新聞曾經爆喊：有諗過係咪無得再做呢行

傅嘉莉 (Kelly) 於無綫劇集《特技人》入面飾演一名藝人，角色的心路歷程和遭遇都同真實的她好相似。今日她出席劇集宣傳活動時表示：「講我啱啱入行被前輩欺凌、同緋聞男朋友車震、又有負面新聞等等，講出咗藝人表面風光，但背後承受好多唔同嘅壓力，我好代入到個角色。自己嘅演藝路上都遇到類似嘅問題，例如屋企人想我結婚生小朋友，佢哋又會擔心我，驚我面對啲負面新聞會好唔開心，驚我handle唔到情緒同壓力。」

不過Kelly卻依然堅持繼續走呢條演藝之路，她說：「我真係好鍾意演戲，會證明畀屋企人知我可以應付到嘅，自己都想喺呢行拼一番事業。我都有不斷反問自己係咪真係好鍾意演戲，當初我都係因為想演戲先由model轉做藝人，畀導演肯定自己嘅演技好有滿足感，如果有得演都有好想繼續演落去，演員條路可以好長，演到老。」

而面對負面新聞，Kelly都努力去克服當中的壓力：「係成長嘅一部分，訓練到自己EQ、IQ，我會做多啲運動，整頭飾等去分散自己嘅注意力，等自己唔好鑽牛角尖。情緒好影響生活，當然都有爆喊過，但明白到有好多自己根本控制唔到嘅因素，我都有學佛，盡量用正面嘅思想去走出困境。失意時都有諗過係咪無得再做呢行，好多謝公司一直都有畀機會我。」