【美女廚房】張敬軒洪卓立帶法寶踩場　「攞你命三千2018」有乜？

《美女廚房》周二（7日）邀請到張敬軒及洪卓立做節目嘉賓，二人相當重視呢個節目，所以帶咗一個法寶上嚟，名叫「攞你命三千2018」，軒仔介紹番呢個法寶有乜先：「銀筷子用嚟驗毒，變黑就唔好食，工業用口罩用嚟防異味，有食物夾，用來夾食物，不用皮膚去接觸，亦都準備咗日本、德國仲有本地著名防肚痾嘅藥物，仲帶咗來自日本嘅幅射檢測器，睇下啲食物有冇幅射，因為聽講今日食嘅食物係生化武器，同埋帶咗餵食器，作用係乜呢？可以直達胃部，減少胃部損傷，最後如果大吉利是，就用呢一個鈴召喚番嚟。」聽完軒仔講，覺得軒仔真係好誇張，不過軒仔表示如果大家有做足功課，完全唔誇張。

洪卓立本身都唔係話好驚，但竟然身邊一眾同事都替佢擔心，點解呢？「因為我有好幾次係內地都有不良紀錄，係內地食完就肚痾，有幾次差少少上唔到台，所以佢地同我出去做嘢食飯都會避開會容易肚痾嘅食物。」在旁嘅軒仔笑說：「佢就係傳說中食物檢查機，一食錯嘢就會肚痾。」

問到二人身邊邊個朋友煮飯最叻？二人不約而同齊指廚神謝霆鋒，軒仔話：「我哋公司當然係謝霆鋒啦！（幾時可以再食到佢煮嘅嘢？）呢個要等佢做完導師返嚟先可以。」而講到煮飯最難食，洪卓立話一定係鍾舒漫：「佢煮嘅食物好安全，但佢味覺好有問題，因為有次同佢馬來西亞食『撈起』，食嘅時候已經索到怪味，我食完一啖已經唔食，但佢話好好食，所以除非同佢出去食，佢煮嘅我會婉拒。」