【盧凱彤逝世】驚聞Ellen離世惡耗 森美哀悼：要多關心身邊朋友
撰文：賴家杰
出版：更新：
森美今日（5日）下午出席眼鏡品牌活動，森美出席呢一個活動原因係因為想幫奧比斯籌款，所以今次除咗現身支持外佢講到自己第一次設計太陽眼鏡，賣到嘅錢全數捐畀奧比斯，十分有意義。
今早盧凱彤墜樓身亡，森美早上得知呢一個消息時候坦言感到唔開心同好惋惜：「我哋圈外圈內都將呢個新聞互相通知，同一時間我都叮囑身邊朋友，好多時候Facebook或者IG有朋友Upload新Post出嚟大家以為同佢接觸緊，我覺得要多啲親身打電話去同佢哋傾吓偈，關心吓大家，可能有啲人會話情緒病就咁傾偈都幫唔到，但有兩件事情會幫到，就係同佢哋傾偈會令到想法會正面啲，知道呢個世界有人關心，第二係聽到佢講嘢好負面，你就要嚮起警號，所以我覺得呢一段時間身邊朋友要互相鼓勵，因為大家都好唔開心。」
森美直言與盧凱彤深入接觸並不多，最多合作主要是訪問。雖然外界揣測盧凱彤因抑鬱而自殺，森美坦言仲未知道原因亦唔會妄下判斷：「就算咩原因都好，關心身邊朋友係應該，呢一段時間我覺得要關心身邊朋友，因為失去身邊一個人，你會感受到嗰一種痛，任何原因都好，大家唔想失去身邊任何一個人更要關心佢哋。」