【全民造星】19歲靚仔姜濤曾經係200磅肥仔：我為咗個女仔而減

ViuTV舉辦的選秀節目《Good Night Show全民造星》已經完成首輪淘汰賽，而昨晚（1/8）播出的一集就出現了一位令大家眼前一亮的參賽者，佢就係19歲嘅靚仔小鮮肉姜濤。當節目內播出面試片段時，見到連平時惡到爆嘅監製花姐，都忍唔住流露出幸福嘅笑容。去到表演環節，姜濤挑選了賀子玲的歌曲《123我愛你》參賽，最終獲5盞藍燈過關。

從小到大是肥仔　最高峰達200磅

姜濤在節目中透露自己從小到大都是個肥仔，最高峰更達200磅，但偏偏喜歡唱歌和表演，過往經常受不同人的嘲笑及打擊。至於問到為何要參加這個比賽，他直言去年參加了內地歌唱節目《快樂男聲》，但進入30強就止步。他坦言當時自己都沒有準備好就參賽，所以今次的選秀對自己來說是一個考試，看看自己是否能克服緊張、自卑等問題：「好多人講死肥仔，或者其他難聽嘅說話，對於一個肥仔嚟講都係一個幾大嘅傷害。睇返自己點解差咁遠，少不免都會有唔開心。既然我要做呢一行，我要有做返呢一行我要有嘅自己。」

帶氧運動不可少　負重運動都要做

問到如何在1年多由200磅減到140磅，姜濤接受《香港01》訪問時便表示最初用了錯誤的減肥方法，試過全日只吃生果兼狂做運動。因為當時還在發育期，所以瘦很快，不過這樣就導致身體差了，所以不建議大家用以上的方法。其後，修讀了運動教練的課程去學習知識和理論，才知道原來要配合帶氧運動及負重運動訓練，兩者兼備才可以減得健康又不會反彈。

他笑言自己一向都比較喜歡美食，所以一個星期或者每半個月就會讓自己放縱一下盡情食，其他日子會吃得清淡：「早餐可以食得豐富啲，因為早餐食嘅嘢都會喺一日裡面嘅活動消耗到。午餐嘅話就食到覺飽就可以，但都係以清淡為主。晚餐其實可以食容易消化嘅食物，因為夜晚主要係俾胃同身體休息嘅時間 ，建議大家可以選擇一啲生果或者生菜等容易消化嘅食物。」

為女神減磅搣甩肥膏　惜對方投他人懷抱

至於談到為何要減磅，姜濤坦言是為了心儀對象：「我係為咗一個女仔而開始減磅，後來個女仔同第二個一齊咗，就覺得其實女仔都係睇樣。嗰時媽咪都好鼓勵我減肥，仲同我講，而家已經好靚仔，減完肥應該會更靚仔。所以我肥嗰時雖然唔太自信，但其實自問自己都唔係太差。減肥之後，身邊嘅人就見到你有改變。減肥初期係辛苦，但當有人見到你有轉變，你又開始見到有成果，就會一直進步。」

由肥仔變成靚仔，姜濤下了不少苦功，既然最初減磅是為了心儀對象，現時又是否多了女性埋身？他笑言自己沒有留意，但現在起碼對人際關係方面會更有自信：「我一直都學習緊點同女仔相處，因為當有女仔同我講嘢嗰時，心態上都覺得自己冇自信，可能自己咁就錯失咗好多機會。」

其實姜濤BB的確幾靚仔，點擊下圖睇真啲：