傳曾志偉亮相ViuTV成導火線　無綫忍無可忍下令封殺

係人都知方丈份人好小氣，真係一個唔覺意就好容易會得罪方丈，近日有傳方丈的黑名單又增添了一員猛將，而呢個人竟然係曾志偉。志偉與無綫合作多年關係一直良好，他的獎門人形象更是深入民心，且成為綜藝組的台柱，有指志偉曾經因為想爭取綜藝組的話事權，而一度與高層余詠珊傳出不和。雖然事後志偉亦有應邀出席去年台慶，不過他卻依然心存芥蒂，且連番犯下三宗罪觸怒TVB，致令TVB終決定要封殺他。

第一宗罪，志偉於2013年的港姐競選期間，曾公然批評由余詠珊負責的新改革賽制，不滿由多年的現場 (Live) 騷轉為錄影節目。到了去年的港姐競選舉行時，他又再出言狠批佳麗的質素，甚至以「慘不忍睹」來形容該屆的港姐決賽。

第二宗罪，有傳志偉曾於2016年亞視熄機時，四出幫亞視搵投資方出錢購買亞視，更向TVB幕後員工進行大挖角，一心想組班由他親自帶領的製作團隊來跟TVB對撼。志偉此舉當然惹來TVB的極度不滿，不過最後因未能成事，故TVB亦不對志偉作追究。TVB也有邀請志偉出席去年的《萬千星輝賀台慶》。

第三宗罪，志偉月前竟然於俄羅斯世界盃2018舉行期間，倒戈亮相ViuTV的《Good Night Show 全民睇波派對》節目擔任嘉賓，又以明星足球隊成員的身份，應ViuTV之邀到俄羅斯欣賞世界盃決賽，擺明唔畀面無世界盃播映權的TVB。他在訪問中仲話將來會再同ViuTV合作，又話TVB唔會咁小器的，但事實上TVB卻視志偉今次的言行是一種挑釁，亦成為了他被封殺的導火線，TVB的高層更是怒不可遏，終忍無可忍而決定要封殺他，嚴禁他再於TVB亮相。

而昨日志偉以代言人出席活動時，被問到可有留意今屆港姐時，雖然有讚今屆的佳麗質素比往年好，但就取笑TVB安排佳麗到西貢取景拍特輯一事，他說：「越南個西貢？原來係香港個西貢，西貢咁遠呀？將軍澳好遠喎！(覺唔覺得失色咗？) 我自己就鍾意以前嘅模式，可以不斷更新嘅，但有啲嘢係需要保留原味。」繼續其敢言，無懼方丈嘅作風。