【BB來了】李佳芯式麻煩媽媽大有人在　陪月達人揭工作辛酸

無綫劇集《BB來了》最近全城熱播，相信一眾劇迷都從中主角李佳芯身上學習到不少育嬰知識。而有追開這劇集的人都知道，劇中李佳芯在最初誕下允豬時，對所有事情都非常敏感，而且要求嚴僅，輔助她的人如老公黎諾懿、自己的父母等都要有如軍訓般跟足她的指示去做，違者便會遭到嚴厲的訓斥。

「畀太太帶住自己行會好辛苦，如果能夠自己帶住太太去行就會舒服好多。」陪月達人Sarah說。

相信絕大部分母親都會非常緊張自己的子女，尤其是新手媽媽，因為所有需要面對的都是人生的第一次。對於所有產後需知、育嬰知識、進補方式等都是聽聞或靠閱讀得悉。而且在現今網絡資訊氾濫的世代，只要定力不足就會誤信謬論。再加上新手媽媽最主要的資訊來源，正是湊大自己的母親。

劇中李佳芯是腌臢媽媽？Sarah表示：「其實好平常啫，更苛刻都大有人在。」

記得有一幕在劇中飾演李佳芯老公的黎諾懿剛下班回家，做酒吧餐廳老闆的他回家的第一時間被要求先洗澡至徹底乾淨才可以接觸女兒，在Sarah眼中這只是小兒科：「其實而家大部分家長都會咁樣做，呢個係衞生問題，當然唔係每個人都咁徹底，但身為做陪月嘅可以話係一個必需。我曾經聽自己嗰班陪月姐姐分享過一個經驗，話太太係醫護人員嚟，要求無論掂過任何嘢bb以外嘅嘢都要洗手，落街買餸返到屋企就要洗頭沖涼換衫，無錯係加重咗我哋做陪月嘅工作量，但絕對可以配合到。」

「其實無論太太要求幾嚴謹都好，只要係為個B，係為件事好嘅就無所謂，因為始終最重要嘅都係個月坐得好。但有啲要求真係太過苛刻，例如聽過有一個陪月講，佢形容直頭係欲哭無淚。佢係去做24（小時）陪月，夜晚瞓覺嗰陣瞓工人房，大熱天時三十幾度都無冷氣，連風扇都無把，其實咁嘅休息環境真係好難頂。」

講起苛刻太太，Sarah愈講愈起勁：「其實做咗咁多年陪月，有咩苛刻嘢都唔覺得出奇，但騎呢嘅就真係好難忘。又醒起一個，全家都係高學歷高知識嘅，喺太太生之前都已經覺得好難搞，因為太太聲明所有嘢都只會講一次，亦都唔可以再問。結果生完之後仲要喜怒無常，嗰次真係挑戰自己嘅eq呀。」

四大長老才是最難應付
不過無論太太再無理都好，Sarah都認為要體諒，原因是太太在分娩後會因為體內荷爾蒙分泌的失調而變得事事敏感又容易緊張，反而最難處理的是人稱「四大長老」的爺爺嫲嫲公公婆婆組合。

還記得飾演李佳芯奶奶的盧宛茵在劇中的一句：「我兩個仔咪又係咁湊大！」Sarah認為這句真的非常不負責任，畢竟時代變了，而且以前坊間的一套育嬰方式的確存在不少錯誤的觀念。Sarah分享了一次自己完勝婆婆的經驗：「我唔係話要認叻，但嗰個太太到而家都會多謝我！好記得阿婆婆喺太太一生完就堅持去煲魚湯畀太太飲上奶餵B，當時我極力反對，因為我知道咁對太太只會百害而無一利。結果太太飲完魚湯兩個鐘頭唔到，就即刻肚痛，仲脹到上胃，最後都要行返我嗰套。不過都明白嘅，有時係要碰過釘先知錯。」

【BB來了】盧宛茵煲花膠湯都唔飲得？ 陪月達人教你煲坐月湯水

所以Sarah就認為，做陪月最重要的除了是專業知識之外，耐性和溝通能力亦尤關重要，當然專業知識是能夠提升自信心去令太太們心悅誠服，否則只會令太太不信任自己，到時無論技巧和知識有多好，工作過程亦只會辛苦和不愉快：「我唔知其他陪月點諗，但我會將太太們當係自己個女咁去照顧，因為坐月坐唔好，有可能影響到太太成世架。」
其實初生媽媽非常需要別關心、關懷，如果陪月員能夠可以善用工作的閒餘時間與太太們聊天，多點了解和安撫媽媽的心情，對媽媽的精神狀態一定有所幫助。

【BB來了】楊卓娜型金牌陪月需兼家庭輔導 原來陪月員都分兩類！