Coffee林芊妤陀仔瞓身教孕婦瑜珈　8月籮咁大個肚歐遊度蜜月

到底藝人基因係咪異於常人？明明身邊朋友大肚，個個都會「幸福肥」珠圓玉潤，不過一眾星媽個個手腳纖幼肥B唔肥人，特別係Coffe林芊妤，近7個月孕肚先得28吋腰﹗其實除咗先天優勢，Coffee都好努力先keep到咁Fit，熱愛瑜珈嘅佢婚後未有停低工作，日前更從早上8點開始教瑜珈，到晚上出席活動仍未有倦意，成為一眾港媽偶像呀﹗

Coffee早兩日出席活動，同20位大肚媽媽練習孕婦瑜珈。懷有「肚腩仔」嘅Coffee身形依然好Fit，做瑜珈亦是綽綽有餘。佢向一眾準媽媽透露，自己希望可以順產，但因為胎盤位置低，要視乎之後「肚腩仔」嘅成長狀況及胎盤位置會否回復正常，先可以決定使唔使剖腹生產。至於生完BB後會唔會停工做full time mum？Coffee就坦言：「要睇吓到時情況點樣，不過我真係太鍾意做嘢，應該會Keep住工作。」

8月份Coffee會同老公到歐洲自駕遊當作渡蜜月，去勻法國、意大利、德國等地，算係佢地最後一次享受「肚腩仔」出世前嘅二人旅行；之後會開始減少工作量，靜待BB出世。問到會否擔心旅途太過奔波或者「肚腩仔」會趕住出世，Coffee表示：「今次會是自駕遊，由老公揸車，我大部分時間坐喺度，應該問題不大，不過如果真係早咗出世就可能會做咗法國人喇，哈哈！」