【入住請敲門．專訪】林婷表現冷靜嚇親人　其實佢都有嘢驚

ViuTV靈異探險節目《入住請敲門》成功製造不少話題，女主持林婷於第一乎季拍攝時，將「唔得呀！好驚。」當作口頭禪，結果令到一眾觀眾嬲嬲豬話要罷睇。
第二季開播，結果繼續有林婷，但觀眾睇完之後都不禁大叫：「真係好癡線」原因係呢位文青女神於節目中異常淡定，夜闖多個靈探點之餘，又在猛鬼酒店大玩都市傳說。到底點解有咁大反差？不如由當事人親自解釋啦。

第一季負評不少，要接拍第二季其實都需要好大勇氣，林婷表示拍攝前都問過身邊朋友的意見，大家都認為可以再試吓，並認為不要因負評而怯。「加上今次拍攝有師傅在旁，成件事安心好多。」林婷繼說《入住請敲門》第一季拍攝前，大部分資訊都係靠聽，又或者從文字上得到，很多時到現場後才發現「幾大出入」，甚為影響情緒，但今次做足準備功課，所以真係無有怕，林婷笑言：「冷靜啲就OK啦，無嘢就真係無嘢㗎啦，今次大家都冷靜咗。」
 

「其實上年我本身係幫Viu拍working hoilday嘅綜藝，點知檔期問題，佢哋問我拍唔拍靈異嘢，話去住吓酒店就ok。」由打工賺錢變為玩命靈探，難怪林婷在第一季時有如此的表現。「第一季我真係好驚，亦都知觀眾想睇更多，吸收了上一次經驗，加上拍攝前睇咗唔少同類型節目，所以今季知道就算驚都要繼續去。網民話我淡定。但其實我係冷靜地緊張。」問到有可向莫竣名請教，林婷笑言問都無用。「佢成日都話唔驚、無感覺，（佢用粗口嚟定驚。）我內心其實都好多句粗口。」
 

提到第一季的負評，林婷坦言唔開心一定有，但她亦想澄清自己並唔係貪生怕死，推工作人員夜探自殺森林。「其實嗰日我哋去富士急鬼屋時，日本位製片佢話自己雖然好驚鬼屋，但完全唔怕真鬼，更自薦幫我哋去夜探自殺森林拍吉鏡，所以就即興多了這一個行程。當晚去到森林之後，電話又收唔到，又黑到伸手不見五指，所以我真係擔心佢，係咁叫佢小心啲，但後來播出時，就剪接到好似我唔去要佢去咁……」謎團終於解開了，林婷說曾經諗過解釋，但為怕被當作是藉口，所以才算罷了。

至於今季，雖然拍攝時都偶有怪事發生，但林婷就覺得唔係太驚，拍攝完成之後亦未有好似莫竣名咁大病一場。她說每次在靈探點拍攝時，因為怕人多唔好辦事，所以基本上只會得主持、攝影師以及師傅「入場」，林婷表示攝影師一句「得㗎啦，無事嘅」如同強心針一樣，令她愈戰愈勇。「但其實佢試過去到某啲位係會成隻手臂麻痺咗，又試過在曾發生碎屍案的單位聽到高跟鞋聲音，佢都係拍完之後先同我講返。」呢位攝影師，正正就係同莫竣名出生入死的Jer仔。

Wardrobe：Tout a coup@ithk

Location：HMV Kafé