【中國好聲音】四導師爭一學員　謝霆鋒使橫手除衫騷肌搶人

明知慾望無限但選擇有限，但人總係貪心希望得到更多更好。謝霆鋒於《2018中國好聲音》擔任導師，第一集已經率先夠籌收滿6位學員，不過佢又驚錯過咗自己鍾意嘅聲音，所以就算自己嗰組已經full house，但第2集都繼續同其他導師搶人，仲keep住「快、狠、準」嘅揀人風格。

繼第一期有學員唱咗《黃河謠》二秒，霆鋒就即刻㩒掣轉身，將佢收歸旗下後；今次選手鄧紫霄就選擇唱番導師謝霆鋒嘅《因為愛所以愛》，雖然學員唱自己歌，但霆鋒聽到最後一秒先㩒掣轉身，霆鋒同學員講：「選曲唔係太啱，但聲音打動咗我。」最後仲俾咗第二次嘅演唱機會佢。

除此之外，另一位學員李佳丹唱完後，四位導師都爭崩頭要人，霆鋒更不惜使「橫手」，喺呢位職業係健身教練嘅學員面前，大晒粗壯結實嘅麒麟臂線條，從而得到共鳴，動手又動口，之後佢又出口術，表示自己已經開始為學員編曲，為嚟緊嘅比賽做準備，「你嘅音樂風格更適合留喺我嗰組。」最後霆鋒嘅真誠同盡責深深咁打動咗呢位學員，加入咗霆鋒嘅戰隊。