【專訪】許廷鏗離脫大台的護蔭　減少曝光未必係壞事

許廷鏗(Alfred)去年中才正式加盟華納，趕及在頒獎禮前夕推出專輯《神奇之旅》，今年上半年已有3首歌派台，8月在麥花臣場館舉行《Simply Me Simply Alfred》演唱會。
轉會後，他在音樂上得到更多自由度，但另一邊廂，卻因為絕跡大台而令曝光率受到一定的影響，是好是壞？他確信自己是走在一條正確的路。

許廷鏗過往在TVB的護蔭下，唱了不少劇集主題曲、也被打造成新世代受歡迎的男歌手，但自從轉投新公司後，卻未有再參與無綫的任何活動，可見分手分得非常徹底。「依家可以話係落地宣傳更多，以前真係好少接觸，但依家可以去到同音樂平台傾rundown，係一個好嘅新嘗試。以前大家好易就見到我、聽到我啲歌，依家可能要去搵，但呢個正正話比自己聽到底做緊嘅嘢係咪值得人哋去追隨，感覺會更實在。」許廷鏗說過往的曝光率係幾厲害，但他現在想將自己的音樂立體化，從而吸引樂迷去追蹤，也可以令他更清楚自己的歌手定位在哪。

近來不時都會想到底歌迷的出現，是因為習慣了在電視看到他，抑或真心喜歡他的歌，答案在《神奇之旅》出現了。「之前見返啲好耐無見嘅歌迷，甚至係一啲新面貌，佢哋有話係因為最近聽咗我嘅歌才出來看看我，嗰種滿足感係好，因為好實在咁話我知，佢哋追隨嘅係許廷鏗以及我的想法，令我想默默耕耘，同埋自己行緊一條啱嘅路。」過往要宣傳新歌，除《勁歌金曲》、《兄弟幫》之外，仲可以加插一個慈善騷，如今沒有了大樹遮陰，會覺得每一步都要花更多氣力嗎？「我係嗰種唔試就唔會郁嘅人，以前唔會特別去掂social network，反而依家用多好多，接下來想拍片，因為歌迷送咗部相機我，應該係想我咁做。」如果要說失的部分，許廷鏗想來想去，也就只有「見少咗一啲幕後工作人員」。

提到《恐怖情人》一曲，少不了聊到愛情的部分。「其實我會係偏向恐怖情人系列，中學時同女朋友去主題樂園，睇煙花睇到喊，有種『我搵到』嘅感覺，依家諗返都幾天真，但其實能夠相信愛情都係一種福氣。」許廷鏗說入行後才與對手分手，主要是因為雙方的生活圈子變得不一樣。「但自己都幾衰，得閒又會關心吓對方，所以將個分手期無限拖長。」至於入行後的感情世界，許廷鏗笑笑表示「有拍過但唔長。」他說父母並不是會將恩愛表現出來的人，更以「鬥氣多過食生菜」形容他們，但這更令他相信世上真有細水流長的愛情。「我一直都感受唔到呢個婚姻係什麼一回事，係一場有人飾演爸爸媽媽的戲，佢哋就連拖手都唔會，同埋噚日先睇完佢哋吵架！哈哈！因為對家人永遠都係最唔畀面，我就係喺呢種環境下長大，所以對愛情看法係有少少唔一樣，以前睇過一部電影話無可能日日都keep到心動的感覺，但換個角色來看，細水流長反而係最好。」

Hair：Derek Li@Xenter

Make Up：Khaki Yan