張建聲冒雨去珠海考賽車牌　兩年無揸車向李萬祺拜師速成

唔少男士鍾意刺激追求速度感，不過喺街上飛車係犯法㗎嘛，唔少人都會近近地到珠海賽車，鍾意揸幾快都得啦﹗興趣多多的張建聲（Justin）最近都抽空去珠海學揸賽車，雖然學車時突然落大雨，影響駕駛的能見度，但亦無阻考取賽車牌嘅決心，最終仲一次合格考到車牌，令Justin大叫感恩！

Justin擁有車牌多年，但平日極少揸車，所以今次去考賽車牌都有好大壓力：「我已經有兩年冇揸車，去到賽車場上堂先知好大壓力，因為車內設備、服裝、揸車時入彎路線同埋要記住地圖，最重要係要聽教練講，好彩今次兩個師傅係李萬祺同Sam哥，佢哋都好有經驗咁帶領我。」

要考賽車賽都唔係輕鬆事，過程要經賽車會考核同批准，再去賽車場考三個環節，雖然如此亦無阻Justin考賽車牌嘅決心：「考賽車牌好大原因係希望將來喺電影拍攝度用得着，仲有係因為從小嘅願望係想突破自己，雖然去到第三節時突然落大雨，但都冇影響到我考車牌嘅決心，因為考牌師傅講就算幾大雨都好，一日未揮黑旗，車手都要不停鬥落去，感覺好似人生不斷戰鬥。」