【天命】譚俊彥拍劇患情緒病：我開心唔到 希望太太原諒

譚俊彥加盟無綫後,拍攝首部劇集《天命》，憑戲中「嘉慶」一角，深受視迷讚賞。「好多謝觀眾欣賞呢套戲，一部電視劇裡面有三百至五百場戲，好難確保每一場戲都係經典嚟嘅，咁一定會有啲地方演嘅時候會攰啦，跟唔上節奏啦，自己會睇番邊度演得唔好，希望下次會再做得好啲囉。」

從事演藝生涯已有18年，譚俊彥經歷過人生底谷，試過三更窮五更富的日子，爸爸（狄龍）曾經極力反對加入娛樂圈，但仍阻擋不了譚俊彥對演藝的熱誠。「爸爸有睇我呢套劇嘅演出，不過佢又唔會畀意見我嘅，因為我有劇本係手，佢又冇，所以佢從來都冇限定我一定要點樣演戲，好似戲裡「嘉慶」一角有躁狂症，殺完老豆，又返入宮中搞大妃子個肚，劇情好亂，我睇劇本就係要捉呢個point。」

因拍內地劇《冰酒窩》與太太任祉妍結緣，如今已是兩孩之父，最近拍攝無綫新劇《十八年後的殺人的告白》令譚俊彥情緒起伏不定，影響了家庭正常生活。「拍呢套劇好影響自己情緒，呢個角色性格上係陰沉，所以開心唔到，而且經常要拍一啲喊戲，仲要走去殺人嘅戲份，自己覺得有少少情緒病，希望快啲拍完，可以盡快delete呢個角色，但因為仲演緊呢個角色，仍然有情緒病，因為回到家中，我仍冇法表現得開心，希望太太原諒。」