【向西聞記】腳板哈哈笑招牌係點解？　「骨精」Yanny：邪骨吖嘛

《向西聞記》劇集首2集就已經在HMVOD預先開播，雖然上映2個月只得2集，但在網上已取得好評，不少網民更迫不急待想欣賞餘下的單元。今日（7月21日）《向西聞記》劇中演員廖子妤（Fish）、陳穎欣Yanny、張沛樂（沙律）到書展攤位中為《向西聞記》小說簽書。

廖子妤接受《香港01》訪問時說，自己在劇中飾演一個「扮台灣男仔嘅香港男仔」，熟悉普通話的Fish在劇內又需要裝不懂。「我唔小心講得太好嘅時候，反而要問返導演咁樣係咪先似返香港講嘅。」Fish更透露為了這次拍攝，特別與樂隊ToNick合作錄了一首新歌。

張沛樂（沙律）在劇中因為感情問題而做了一名PTGF（Part-time Girlfriend / 兼職女友）。「我成日都諗PTGF應該點做，係咪要好姣呢，但其實又唔係，我可以做返我自己。我問導演講粗口係可以man啲？（你成日講粗口？）我唔係好講粗口㗎，所以呢一套劇，我見到啲粗口對白係好興奮㗎。」

至於陳穎欣Yanny，就是飾演一名「骨妹」。自言是「骨精」的她，表示首次進入桑拿場所感到十分新奇。「我入到去就好八卦咁，唔知啲阿姐係點呢，啲制服又係點嘅呢，好似去探秘咁。」「骨妹」Yanny表示，拍攝時也是十分多尷尬場面：「有一場我要幫阿正踩背，因為你知做骨妹唔可以着襪，跟住我隻腳趾就踩落佢個背脊度，仲呃佢話我有灰甲，問佢驚唔驚。佢就話：『真係有啲臭喎。』（講起骨場，你知唔知腳板有個哈哈笑嘅招牌係點解？）邪骨吖嘛，啲人講嘅。」