鄭嘉穎陳凱琳父女戀下月結婚海外行禮　婚後即全力趕生B？

下月中就49歲生日的鄭嘉穎與現年27歲的女友陳凱琳 (Grace) ，年前因為拍攝無綫劇《殭》而擦出愛火，兩人年齡相差22年仍無阻愛情的魔力，拍拖至今3年一直非常sweet。雖然這段父女戀開始時並不被外界看好，更有指Grace的父親很反對兩人交往，不過嘉穎同Grace愛得認真，未有受到各方阻力影響，而兩人的戀情終於可以開花結果。有消息指兩人將於下月在海外舉行小型婚禮，邀請十多位至親好友出席見證和分享他們的幸福和喜悅。

其實Grace之前已公開表示過視嘉穎為Mr.Right，早就認定了嘉穎做結婚對象，去年中她亦有講過結婚是兩年內的事，有次更於IG自稱已有「未婚夫」，當時嘉穎冧爆回應：「係咪講緊我呀？」兩人隔空傳情甜到漏。至於嘉穎當然亦好愛錫Grace，據知年紀不少的他好想盡快同Grace生B組織美滿家庭，有報道指鄭嘉穎早前已經求婚成功，於海外舉行小型婚禮後，會於加拿大擺喜酒再宴請親朋。

據知，嘉穎和Grace的小型婚禮親友名單包括嘉穎拍攝《鐵馬尋橋》時的幾位好兄弟馬國明、林子善、黃嘉樂以及「阿妹」唐詩詠等。而Grace的一班好姊妹陳嘉寶、賴慰玲等亦會獲邀請出席祝福一對新人。嘉穎的媽咪對Grace呢位未來新抱亦是非常滿意，有讚無彈，Grace知男友最錫媽媽，故一早行奶奶政策，深得未來奶奶歡心。嘉穎的一眾老友亦大讚Grace呢位未來阿嫂係好女仔，人品好，令嘉穎更加愛惜Grace。嘉穎與Grace向來都鍾意BB，加上嘉穎快將步入50歲，所以兩人婚後亦會全力造人生B。

一對準新人分別被問到有關下月結婚的消息，都已夾晒口供，口徑一致地表示：「多謝大家關心，我哋兩個感情好好，至於結婚呢，有消息再通知大家。」可見兩人好有共識，兼且並沒有否認有關下月結婚一事，真係恭喜晒。