【BB來了】金牌惡奶奶盧宛茵自言演戲靠天份：出道已經有人讚我叻
撰文：林迅景
出版：更新：
《BB來了》上映以來反應熱烈，劇情貼地又笑中帶淚，實在是引來不少新生爸媽的共鳴。《BB來了》第四集更錄得跨平台收視30.2點，今日一班演員在TVB電城舉行小型祝捷記者會。提到《BB來了》的演員陣容，不少人都記得劇中的惡奶奶「西太后」盧宛茵，她飾演惡奶奶簡直是入木三分。到底盧宛茵飾演惡奶奶有甚麼秘訣呢？
盧宛茵（人稱Madam Lo）接受《香港01》訪問時説：「冇咩秘訣㗎，我覺得演戲係天份。哈哈，唔係話懶叻，不過係真嘅，有時領略到，就少少位都做到，但係如果你get唔到，就點樣誇張做都做唔到，仲有反效果。」Madam Lo更自言由出道以來就已經「有天份」：「我好記得197幾年，我就啱啱讀完訓練班出嚟，我嗰時仲係新人乜都唔識，但係黃曼梨（Mary姐）就指住我問我係邊個，其他人話：『訓練班，實習嘅。』Mary姐就話：『嘩，咁好嘢嘅，好似做咗好耐好有經驗喎。』我就記到宜家喇，哈哈。」
當然，Madam Lo除了得天獨厚外，原來她養成的習慣也對演技十分有幫助。「我平時好鍾意自己一個人睇下人哋啲動靜，譬如自己係街行下，或者坐喺Coffee Shop觀察下，譬如呢對情侶會點，然之後就估下佢哋之後會點。」所以說，盧宛茵的好演技就是這樣鍊成的。