【延禧攻略】女主角唔再玩柔弱睇得過癮　有佘詩曼收視實冇死

在今年缺乏古裝劇情況下，內地金牌製作人于正監製的作品《延禧攻略》突圍而出，趕在范冰冰《巴清傳》﹑周迅《如懿傳》前播，一開播就大受歡迎睇到唔少觀眾上晒癮，有別於以往于正製作的作品（過去大多被批評是爛劇），今次的確令人刮目相看，除了清裝服飾﹑頭飾參照原型歷史之外，最重要的是女主角人物設定唔再係「傻白甜」（意指：皮膚白皙、長相甜美、個性傻氣）柔弱女子，而且劇情進度亦非常緊湊，睇到大家入晒戲，已經吸引唔少人做會員收睇。

事實上，過去睇一些宮廷劇好明顯女主角大多是「傻白甜」，之後一步一步爬上高位。唔講其他就講同該劇劇情似到足的《宮心計》，雖然故事情節是發生在兩個朝代，但同樣是入宮為找姐姐，《宮心計》的元玥（劉心悠飾）就甜蜜傻頭傻氣慢慢爬上高位；而《延禧攻略》的女主魏瓔珞（吳瑾言飾）就有別過去這一些女主，唔再係「傻白甜」而係膽大過人，即使受到人欺負自己都冇有怕就「以牙還牙」，令其他人都驚她三分，對於這一種人物設定睇到好多電視友超過癮，最起碼唔再係替女主角感到可憐（從前女主角被人欺負），大家一致拍手掌叫好「就喜歡這種女主」﹑「女主强硬反擊不受欺負的性格我喜歡」…睇嚟大家已經睇厭柔弱女主。

另外，過去對於這一些宮廷劇好多時劇情都是拖延的，但《延禧攻略》令人眼前一亮，一開始劇情已經相當緊湊，在女主角身上陸續發生好多事情，靠著她的小聰明一一化解，這一點大家都有讚無彈似乎加速進入主題先係大家最想睇的，正正因為如此唔少人都寄予厚望，望之後劇情唔再爛尾。

值得一讚的是該劇的畫面﹑服飾﹑頭飾都相當有古典美（清朝感十足），從畫質來睇色調偏暖帶有冷淡風，非常迎合那個時代環境的清美，特顯出後宮寂寞的感覺；而服飾上據知開拍前劇組已經翻查歷史做資料收集，無論妃子﹑宮女的服飾，都同原型的服飾一樣非常講究；另外講到頭飾好多人睇完都認為後宮女子為何頭上戴了成盤似水果盤的飾物似的，其實不然這一些頭飾正正是歷史原型，就好似宮女一入宮待選的時候，綁一條長辮正正是清代特色，而不是過去電視劇中一開始就梳「兩把頭」咁，將清代真正文化呈現出來，令人睇得更投入。

在播了幾集之後，唔少電視友都對高貴妃的「唇妝」特別好奇，這一點其實都是參照歷史上后妃妝容，突顯櫻桃小嘴一面，在清代就流行「花瓣唇妝」。近年韓式化妝漸漸流行起來，大多人都以為韓國是「咬唇妝」的先鋒者，其實在明﹑清兩朝的時候已經興盛，可想而知中國的古典美有幾深遠流長。

睇《延禧攻略》除了睇美人﹑美景之外，其中相隔多年再演清裝劇的佘詩曼飾演嫻妃絕對是一大亮點，唔少人都是為她而睇，皆因今次是她演藝生涯上難得一次出演奸角，一舉一動令人毛骨悚然，雖然目前播出仲未變奸，但令人期待。而該部劇集早前無綫方面亦已睇中外購，目前會在收費台播出，可見無綫眼光獨到想必該劇會引起追劇潮。

以下美人美景照展現清代文化：