【BB來了】婆媳關係原是千古難題　對住奶奶要當自己練緊EQ

無綫劇集《BB來了》播出以來收視與口碑俱佳，貼地的題材睇得一班觀眾同網民都好有共嗚。劇中做人新抱的李佳芯以及做她奶奶的盧宛茵，亦演活了婆媳對立的角色，真實咁呈現出日常生活中的婆媳關係。係人都知婆媳關係是一個千古難題，作為新抱的如果有得揀就當然不要同奶奶一齊住啦，但如果無得揀之下，新抱同奶奶同住難免會易生磨擦，各種問題亦會隨之而發生，輕則睇大家唔順眼，甚至形成勢不兩立的敵對局面，嚴重的話分分鐘演變成家庭悲劇。到底有咩方法可以有效處理婆媳關係，令大家可以融洽些？以下3個方法做人新抱的一定要識。

1. 當奶奶說話係耳邊風
大家要留意返，當奶奶的說話係耳邊風並不是叫大家不要聽太太講話，不尊重奶奶，而是勿將奶奶講的說話太上心，尤其是一些難聽的說話。有唔少奶奶好難相處，確是好鍾意畀說話個新抱聽，作為新抱聽到當然會唔開心。不過其實不用太認真對待奶奶所講的嘢，啱聽就聽，若然唔啱聽大可以當奶奶唱歌，聽完就算，唔好上心，認真你便輸了。就當是訓練一下自己的EQ，調節一下自己的心態去同奶奶相處，左耳入右耳出自然就唔會因為奶奶的說話而影響到情緒。

2. 陽奉陰違
逢係奶奶都鍾意聽教聽話的乖新抱，難道有人會鍾意一條頂心杉嗎？當奶奶有咩吩咐時，採取陽奉陰違的政策絕對可以避免好多正面衝突。作為新抱，奶奶叫你做咩你都話：「好，哦。」笑住咁應奶奶一聲，奶奶自然就會覺得呢個新抱好尊重她，都唔會點刻意刁難你。而你應完奶奶之後唔做，奶奶都無你符，亦未必會知道，甚至根本已經忘記了。如果奶奶再提點，咪繼續「好，哦。」，無須同兜口兜面反抗奶奶兼「撐到行」。

3. 交足戲
為人新抱一定要識得交戲畀奶奶，基本禮貌唔使講，對奶奶的噓寒問暖必不可少，就算唔關心自己老公同父母，都千其要記得關心奶奶，例如提她天氣凍要着多件衫、得閒陪奶奶傾偈飲茶食飯、過時過節送禮物以表孝心等等。見到奶奶就出力畀多些笑容，當自己賣笑亦無妨，多些讚下奶奶，例如讚她手餸煮得好味、讚她個新look靚之類，氹下奶奶開心，對奶奶交足戲實無錯。