【港姐2018】Honey不介意大眾對健康膚色女仔睇法：我經歷咗好多

今屆《香港小姐2018競選》入圍佳麗可算是各有特色，尤其是膚色方面更罕有地出現一身古銅色皮膚的「美人魚教練」何泳芍（Honey）。雖知道歷屆當選港姐大多擁有雪白肌膚，所以古銅色皮膚的Honey相比之下可能較為輸蝕。14號的何泳芍（Honey）接受《香港01》訪問時就表示，自己參選是另有目的。

Honey說：「我參選原因係因為想改變大眾對我哋健康膚色女仔嘅想法，所以我就同咗媽咪講我想參選，而佢都好支持我，就做咗我提名人。」她更透露，由小學就擁有健康膚色的她其實聽過不少冷嘲熱諷。「我細細個就開始操水，所以膚色就偏向健康色，不過我膚色就唔係天生嘅。（細個有冇人話過你黑妹？）有好多，更加難聽嘅說話都有。（例如？）嗯...黑過舊屎嗰啲囉，好似朱古力咁樣囉。（你嗰時心情點？）其實我細個自信好唔夠，之後去咗美國讀書一年，發現原來嗰邊嘅人好欣賞我呢種膚色，然後我先再慢慢建立返自信，所以我都經歷咗好多。（想唔想白返啲？）其實都有嘗試過，但係自己真係好熱愛潛水同游水，所以都冇刻意，或者咁講，我唔會為咗人哋想法而放棄自己鍾意做嘅嘢。」

至於為甚麼何泳芍的英文名叫做Honey，原來又有個故事。「個名係細個嘅時候朋友改，因為細個嘅時候我成日俾蜜蜂針，哈哈，所以佢哋成日話我俾蜜蜂追住，慢慢就叫咗我做Honey。」