【C9特工】黃建東曾到紐約讀戲劇　無悔返港做配角：要放低過去！

無綫藝人黃建東（Derek）2011年參選「香港先生」入行，憑自彈自唱自己創作的歌曲、Rap、角色扮演以及跳踢躂舞勇奪「演藝潛能大獎」。7年間，阿東除了演戲之外，還做過主持，亦參演過電影，只不過未能同觀眾留下深刻印象。2014年，他憑劇集《食為奴》中「九阿哥」一角而為人熟悉，兩年前因二次創作日本洗腦歌《PPAP》廣東話粗口諧音版而人氣急升，至去年更在《降魔的番外篇 ── 首部曲》首度擔正。繼今年在《果欄中的江湖大嫂》扮中年搬貨阿叔後，他再次接拍新劇《C9特工》扮核突佬角色，但原來一早他一早已經衝出香港，在紐約發展......

負笈紐約主修戲劇　返港放下過去

阿東讀完中七後，一心想加入娛樂圈發展，在家人支持下，他前往美國紐約州立大學佛東尼亞分校戲劇系主修演戲，還以高級榮譽畢業，其後在外百老匯（Off Broadway）參與過演出，相比百老匯，前者規模較小，劇場座位介乎100到499個之間，然而表演風格更自由，他更因此成為美國舞台劇演員公會（Actors' Equity Association）的演員。返港後，阿東加入香港話劇團做演員，參演過不少話劇和舞台劇的演出，包括《德齡與慈禧》、《暗戀桃花源》，而在《安娜與陳七》，他更一人分飾19角，相當有實力。

自己是科班出生，演藝經驗豐富，但現在TVB工作，似乎有點屈就，「其實當我返嚟香港重新開始嘅時候呢，已經知道要擺低過去，因為係活在當下嘅，唔可以話我以前係點樣，返到嚟就要點點點，咁樣係唔Work嘅。特別喺演藝圈，其實學歷對演員嚟講係唔重要嘅嘛，所以自己唔會畀嗰樣嘢困住囉。」阿東直言自己適應能力強，去到哪裡都可以生存，所以一早已經放低。

刻意醜化自己殺出新血路

阿東說加入TVB之後，聽到太多的意見，自知並非「靚仔」類型，自從二次創作神曲《PPAP》成功之後，阿東發現「醜醜哋」的自己反而觀眾更受落：「因為有時自己認真嘅時候好似有啲惡咁，所以之後有《I've found my GF!!!》呢條片，又有林作嗰條片，都係一啲令到自己醜化啲，令到自己迎合到大眾口味多啲囉，因為就算我最靚個樣，都唔及真係靚仔小生嘅一半樣囉，咁我知道呢樣嘢，所以反而覺得自己走嗰啲小小醜角呀，小小騎呢、搞笑呀，觀眾會認得我囉，觀眾會鍾意我呢一面囉。」好多時候，演員帶給觀眾歡樂的背後都是心酸，阿東坦言自己都會有小小唔開心，不過會抑制住：「我知道呢一行其實係唔容易做，咁自己可以殺出一條血路已經好唔容易，同埋我係樂觀底嘅，我唔會沉溺喺唔開心，可能當下自己會覺得『咦，點解咁嘅……』但係瞓一晚就OK晒。」

新劇專食師奶「豆腐」　電髮新Look似中佬

阿東今次和馬國明會在新劇《C9特工》中做好兄弟，他大讚馬明好人，無論工作定私底下，都是一個好貼地的人。阿東在劇中將飾演一個豆腐檔檔主，講起這個角色，阿東也覺得好有趣：「我個角色叫豆腐黃，裏面幾得意嘅，個角色介紹我係專食啲師奶豆腐嘅，為人有啲風趣幽默啦，有啲抵死呀，撩下啲師奶。」

阿東還說今次造型的其中一個特點就是髮型：「今次做街市佬，之前做過果欄搬貨佬，今次想有啲唔同嘅造型，所以監製就要我去電髪，電咗一頭中年嘅頭髮，每次開工前都要捲差唔多9個字，要set頭。」阿東笑言好多人見到他這個造型，都說他與《果欄》連戲，還有個肚腩仔，相當貼地，不過他並不想被定型在這類角色，所以都在積極做運動：「我同朋友參加一個禮拜跑15k嘅挑戰，如果唔係就要罰200蚊美金，每個禮拜計喎，咁所以就逼到我跑步，要firm返啲囉，瘦返小小。」